"ორიოდ წამით კი შევყოყმანდი: რომ არ გამყარდეს?"- რისი "იმედი" აქვს კახა კოჟორიძეს

სოც.მედია - 11:45, 02 Sep, 2015

3615

ეროვნული ბანკის შესახებ კანონში შესატან ცვლილებებზე პრეზიდენტის ვეტოს დაძლევისთვის საქართველოს პარლამენტის მზადებას და სამთავრობო გუნდის მხრიდან ამ მოვლენასთან დაკავშირებულ იმედებს, პრეზიდენტის მრჩეველი კახა კოჟორიძე ფეისბუკზე ეხმაურება. როგორც ჩანს, კოჟორიძე დოლარში აღებულმა პირადმა საბანკო ვალდებულებამ ცოტათი დააბნია:

"ბევრი ჩვენი თანამოქალაქის მსგავსად, მეც დოლარში მაქვს საბანკო კრედიტი. მოახლოვდა გადახდის ვადა და დღეს დოლარის ყიდვას ვაპირებდი. მივედი სავალუტო ჯიხურთან და ის იყო, უნდა მეყიდა, რომ უცებ გონება გამინათდა: ,,დღეს ხომ პარლამენტმა პრეზიდენტის ვეტო უნდა დაძლიოს? შესაბამისად, ხვალიდან ხომ ლარი გამყარდება? არ ჯობია დოლარი ხვალ ვიყიდო? უფრო მეტი მომივა“, - გავიფიქრე.

ორიოდ წამით კი შევყოყმანდი: რომ არ გამყარდეს? და სწორედ ამ დროს გამახსენდა იმ რკინის არგუმენტების ნიაღვარი, რითაც ასე დამაჯერებლად დასაბუთდა არსებითი ცვლილებები კონსტიტუციურ ინსტიტუტში და ვეტოს დაძლევის უცვლელი შემართება პარლამენტში. „არა, ყოველივე ამის შემდეგ, დაიძლევა თუ არა ვეტო, ლარს უბრალოდ ყველა გზა მოჭრილი ექნება და იძულებული იქნება ხვალიდანვე გამყარდეს“.

ამ იმედიანი ფიქრით დავტოვე სავალუტო ჯიხური და დოლარის ყიდვა ხვალისათვის გადავდე"- წერს კოჟორიძე.