დღეს, პარლამენტის ბიუროს სხდომაზე, პარლამენტის რეგლამენტის თანახმად, 2015 წლის საშემოდგომო სესია გაიხსნა. როგორც ბიუროს სხდომის თავმჯდომარემ, პარლამენტის თავმჯდომარის პირველმა მოადგილემ მანანა კობახიძემ განაცხადა, ქვეყნის უმაღლესი საკანონმდებლო ორგანო უკვე ხვალიდან, 2 სექტემბრიდან, პლენარული სხდომების რეჟიმში გააგრძელებს საქმიანობას.

მანანა კობახიძე საქართველოს მთავრობაში დღეს მომხდარ ცვლილებებს გამოეხმაურა და იმედი გამოთქვა, რომ მთავრობის ძველი და ახალი წევრები ახალ პოზიციებზე ქვეყნისათვის სასიკეთოდ, წარმატებებით გააგრძელებენ საქმიანობას. პარლამენტის თავმჯდომარის პირველმა მოადგილემ სექტემბრის პირველ დღეებში ასევე ტრადიციულად მიულოცა რამდენიმე ათეულ ათას ახალგაზრდას სტუდენტებად გახდომა და ცხოვრების ახალ ეტაპზე წინსვლა და წარმატებები უსურვა.

ამის შემდეგ ბიუროს წევრებმა მიმდინარე სასესიო კვირის - 2-4 სექტემბრის პლენარული სხდომების დღის წესრიგზე იმსჯელეს და სხდომებზე განსახილველ საკითხთა სავარაუდო ნუსხა განსაზღვრეს. ერთ-ერთი მთავარი საკითხი, რომლის განხილვაც იგეგმება, საქართველოს პრეზიდენტის შენიშვნებია „საქართველოს ეროვნული ბანკის შესახებ“ საქართველოს ორგანულ კანონში ცვლილების შეტანის შესახებ“ კანონპროექტსა და მის თანმდევ კანონპროექტებზე.

სხდომაზე განიხილეს ახალი საკანონმდებლო ინიციატივები და განსაზღვრეს წამყვანი კომიტეტები და ის კომიტეტები, რომელთა დასკვნაც სავალდებულოა. ასევე განიხილეს საორგანიზაციო საკითხები.
პარლამენტის პლენარული სხდომა 2 სექტემბერს, 13 საათზე გაიმართება, მანამდე კი ბიუროს კიდევ ერთი სხდომა შედგება.