საქართველოს საზოგადოებრივ საქმეთა ინსტიტუტის პროფესორი, ექსპერტი თორნიკე შარაშენიძე ეკონომიკის ყოფილი მინისტრის გიორგი კვირიკაშვილის საგარეო საქმეთა მინისტრად დანიშვნის ფაქტს „ნიუპოსტთან“ აფასებს. მისი თქმით, საკადრო ცვლილებები ბიძინა ივანიშვილთან შეთანხმებულია.

-"ერთადერთი ახსნა აქვს კვირიკაშვილის საგარეო საქმეთა მინისტრად დანიშვნას, ბიძინა ივანიშვილთან სიახლოვე..."

-როგორი მინისტრი იქნება კვირიკაშვილი, რომლის ეკონომიკის მინისტრად მუშაობას, ოპოზიცია უარყოფითად აფასებს. „ნაციონალურ მოძრაობაში“ ამბობენ, რომ „ეკონომიკის წარუმატებელ მინისტრს, საგარეო უწყება ჩააბარეს“...

-ეკონომიკის მძიმე მდგომარეობას მარტო მაგ კაცს ვერ დავაბრალებთ, თუმცა საგარეო საქმეთა სამინისტროში ისეთი ადამიანის დანიშვნას, რომელსაც საგარეო პოლიტიკასთან შეხება არ ჰქონია ცოტა უცნაურია. ეს უწყება ძალიან სპეციფიკურია, მას როგორც წესი ხელმძღვანელობენ პროფესიონალი დიპლომატები.

-კვირიკაშვილის დიპლომატიურ მომავალს სკეპტიკურად უყურებთ?

- დიახ, ძნელია, „არასაგაროელისთვის“ საგარეო სამინისტროში მუშაობა და იმ მჭიდრო ურთიერთობების დამყარება რაც ამ სამინისტროს ხელმძღვანელს ევალება.

- როგორ შეაფასებთ თამარ ბერუჩაშვილის 10 თვიან საქმიანობას?

- ბერუჩაშვილს არაფერი გაუფუჭებია, ჩავარდნა არ ჰქონია არაფერში...

- მთავარი მიღწევა რა არის ამ პოსტზე მისი მუშაობის პერიოდში?

- საგარეო საქმეთა სამინისტროს განმახორციელებლის ფუნქცია აკისრია. ის არ შეიმუშავებს საგარეო პოლიტიკას. რასაც ბერუჩაშვილი ნორმალურად ასრულებდა.

დავით ჯაბაშვილი