„თავისუფალი საქართველოს“ ლიდერი კახა კუკავა სამთავრობო ცვლილებებს ნეგატიურად აფასებს.

კუკავას თქმით, გიორგი კვირიკაშვილის დანიშვნა თამარ ბერუჩაშვილის ადგილზე ნიშნავს, რომ საქართველოს არაკომპეტენტური საგარეო საქმეთა მინისტრი ეყოლება.

ამის შესახებ კუკავამ „ნიუპოსტთან“ საუბარში განაცხადა.

„ჩემი აზრით ორივე ცვლილება ნეგატიურია. საგარეო საქმეთა მინისტრად გიორგი კვირიკაშვილის დანიშვნა ნიშნავს იმას, რომ მთავრობა აგრძელებს მთავრობის ჭიკაიზაციას ანუ როდესაც თანამდებობაზე ინიშნებიან აბსოლუტურად არაკომპეტენტური პირები. კვირიკაშვილმა ეკონომიკის მინისტრად ყოფნის პერიოდშიც დაგვანახა თავისი არაკომპეტენტურობა და უუნარობა. ქართული ეკონომიკა სრულ კრახში შეიყვანა. თუმცა ეკონომიკის სფეროში მას გამოცდილება მაინც ჰქონდა. როდესაც საგარეო საქმეთა მინისტრად ინიშნება ადამიანი, რომელსაც არც დიპლომატიასთან, არც საგარეო ურთიერთობებთან არასდროს შეხება არ ჰქონია, ეს ნიშნავს, რომ არაკომპეტენტური საგარეო საქმეთა მინისტრი გვეყოლება“, - ამბობს კუკავა.

რაც შეეხება ქუმსიშვილს, კუკავას თქმით, ამ შემთხვევაში პრობლემას კორუფცია წარმოადგენს.

„რაც შეეხება ეკონომიკის მინისტრად დიმიტრი ქუმსიშვილის დანიშნავს, ეს კიდევ უფრო მძიმე გადაწყვეტილებაა. აქ პრობლემა გვაქვს არა არაკომპეტენტურობასთან, არამედ - კორუფციასთან. ქუმსიშვილი ბიძინა ივანიშვილის პირადი კადრია. ეკონომიკის მინისტრად მისი დანიშვნა ნიშნავს, რომ საქართველოს სახელმწიფო პრივატიზება ბიძინა ივანიშვილის ოჯახის პირადი პრიორიტეტი იქნება. რაც შეეხება ბერუჩაშვილს, მისი ფანი არ ვიყავი, მაგრამ ის კარგი დიპლომატი იყო. ირაკლი ღარიბაშვილი თავს არაკომფორტულად გრძნობს კომპეტენტურ ადამიანებთან ურთიერთობაში, ასევეა ბიძინა ივანიშვილი. ღარიბაშვილი თავს გრძნობს კომფორტულად ჯანყარაშვილის, თამაზაშვილების და ჭიკაიძის წრეში. ბერუჩაშვილი იყო თეთრი ყვავი ამ გაუნათლებელი ადამიანების წრეში“, - განაცხადა კუკავამ.