,,სერიოზულ ცვლილებებს უახლოეს მომავალში უნდა ველოდოთ...“ -ქარდავა სამთავრობო ცვლილებებზე

პოლიტიკა - 13:28, 01 Sep, 2015

2213

მთავრობაში განხორციელებულ ცვლილებებს აფასებს არასაპარლამენტო ოპოზიციის ერთ-ერთი ლიდერი ბაჩუკი ქარდავა. კითხვაზე თუ რამდენად ლოგიკური იყო პრემიერის მიერ მიღებული გადაწყვეტლება, ქარდავა ამბობს, რომ თავის დროზევე არალოგიკური იყო საგარეო საქმეთა მინისტრად თამარ ბერუჩაშვილის დანიშვნა, რადგან მისი თქმით, ქვეყანას, ფაქტობრივად არ გააჩნია საგარეო პოლიტიკა. ქარდავა ,,ნიუპოსტთან“ კომენტარში აცხადებს, რომ დღეს ქვეყანაში ბევრად უფრო მნიშვნელოვანია ის, რაც მედიასთან მიმართებაში და სოციალურ-ეკონომიკური კურთხით ხდება, ვიდრე ერთი ეპიზოდური სამთავრობო ცვლილება, რომელიც მისი განმარტებით, არსებული პრობლემების ფონზე არაფრის მომტანია. ,,მე თამარ ბერუჩაშვილს შეურაცხყოფას არ ვაყენებ, მაგრამ არა მგონია, რომ მისი გადაყენებით ქართულმა საგარეო პოლიტიკამ რამე დაკარგა. ის ისედაც არ გაგვაჩნია. თუმცა ასეთი არარსებული და ჩავარნდილი საგარეო პოლიტიკის ფონზე, ქართულ ეკონომიკაში არსებული ,,ფურორის“ გათვალისწინებით, ლოგიკაზე საუბარი ზედმეტია. ეს ცვლილება მთავრობაში, იმდენად არაფრის მომტანი და არაადექვატურია, რომ ამით შემოვიფარგლები. სერიოზულ ცვლილებებს ალბათ უახლოეს მომავალში უნდა ველოდოთ. თქვენ წარმოიდგინეთ, რომ ამ სამთავრობო ცვლილებებზე უფრო მეტად, დღეს, საზოგადოების ყურადღება მედიაში მიმდინარე პრობლემებისკენაა მიმართული. ხალხს ის უფრო აინტერესებს, როგორ განვითარდება პროცესები ,,რუსთავი 2“-სა და ,,იმედზე“ ინგა გრიგოლიას ,,რეაქციის“ გარშემო, თუ რა მოხდება ლარის კურსთან დაკავშირებით და ასე შემდეგ. ის რომ ქვეყანაში იდევნება განსხვავებული აზრი და პრობლემები გვაქვს ეკონომიკაში, ბევრად უფრო მნიშვნელოვანია, ვიდრე ერთი კონკრეტული ცვლილება, რომელიც არაფრის მომტანია“ - აცხადებს ბაჩუკი ქარდავა