აშშ-ში დავით უსუფაშვილის სამუშაო ვიზიტი მიმდინარეობს

პოლიტიკა - 09:41, 01 Sep, 2015

1064

ნიუ-იორკში, საქართველოს პარლამენტის თავმჯდომარის, დავით უსუფაშვილის სამუშაო ვიზიტი მიმდინარეობს.

პარლამენტის თავმჯდომარე გაეროს შტაბ-ბინაში, საპარლამენტთაშორისო კავშირის (IPU) მიერ ორგანიზებულ, პარლამენტის სპიკერების მე-4 მსოფლიო კონფერენციაში მონაწილეობს.

კონფერენცია საპარლამენტთაშორისო კავშირის პრეზიდენტის, საბერ ჩოდერის, გაეროს გენერალური მდივნის, პან გი მუნისა და გაეროს გენერალური ასამბლეის პრეზიდენტის, სემ ქუტესას მისასალმებელი სიტყვებით გაიხსნა.

კონფერენციის მონაწილეებს მიმართა, ასევე, გაერთიანებული ერების განათლების, მეცნიერებისა და კულტურის ორგანიზაციის სპეციალურმა წარმომადგენელმა მშვიდობისა და შემრიგებლობის საკითხებში, მსახიობმა და ჰუმანისტმა ფორესტ უიტეკერმა.

პარლამენტის სპიკერების მე-4 მსოფლიო კონფერენციის დღის წესრიგი ფოკუსირებულია მშვიდობის, დემოკრატიისა და განვითარების საკითხებზე, რომლებიც საპარლამენტო ჭრილში განიხილება.

დავით უსუფაშვილი სამუშაო შეხვედრები გამართა უგანდის პარლამენტის სპიკერთან, რებეკა კადაგასთან; საფრანგეთის ეროვნული ასამბლეის ვიცე პრეზიდენტთან, ლორენს დუმონთან; ჩეხეთის წარმომადგენელთა პალატის პიკერთან, იან ჰამაჩეკთან და შვედეთის პარლამენტის სპიკერთან, ურბან აჰლინთან.

,, დღეს აქ, ნიუ-იორკში თავი მოიყარა მსოფლიოს ყველა ქვეყნის პარლამენტის სპიკერებმა, ერთადერთი რუსეთის პარლამეტის სპიკერი ვერ ჩამოვიდა, იმიტომ, რომ რუსეთის და შეერთებული შტატების დღევანდელი მდგომარეობის გამო მას შეერთებულმა შტატებმა სათანადო ვიზა არ მისცა, დანარჩენი მთელი მსოფლიო აქ არის. რა თქმა უნდა, ჩვენ გამოვიყენებთ ამ შესაძლებლობას იმისთვის, რომ გვქონდეს ორმხრივი შეხვედრები სხვადასხვა ქვეყნების პარლამენტების თავმჯდომარეებთან, განსაკუთრებით იმ ქვეყნებთან, რომელთანაც ჩვენ გვაქვს გაზრდილი ინტერესი, ვისგანაც ჩვენ გვინდა მხარდაჭერა გაეროს ეგიდით იმ რეზოლუციისთვის, რომელიც ცნობილია როგორც დევნილების დაბრუნების რეზოლუცია, მაგრამ სინამდვილეში ეს ნიშნავს ქვეყნის ტერიტორიული მთლიანობის თოაბაზე მსოფლიო საზოგადოების მხარდაჭერის უზრუნველყოფას. იცით, რომ ამ თვალსაზრისით ჩვენ გვაქვს პროგრესი, გასულ კენჭისყრაზე მეტმა ქვეყანამ დაუჭირა მხარი და გვქნება შეხვედრები იმ ქვეყნებთანაც, ვისთანაც მეტი მუშაობაა საჭირო, აგრეთვე იმ პარლამენტებთან, იმ ქვეყნებთან, ვისთანაც ჩვენ გვინდა კიდევ უფრო ღრმა კონტაქტები ვიზალიბერალიზაციის პროცესის წარმატებით დასასრულებლად, ნატოში ინტეგრაციის პროცესში მხარდაჭერისთვის, ამიტომ გვექნება შეხვედრები ნატოს წამყვანი ქვეყნების პარლამენტების წარმომადგენლებთან, ვისთანაც კიდევ უნდა გაგრძელდეს მუშაობა.“- განაცხადა დავით უსუფაშვილმა ვიზიტთან დაკავშირებით.