მინდა ვისურვო, რომ ყველა ტელეკომპანიამ დამოუკიდებლად გადაწყვიტოს თავისი პოლიტიკა- უსუფაშვილი

პოლიტიკა - 23:52, 31 Aug, 2015

1326

საქართველოს პარლამენტის თავმჯომარე დავით უსუფაშვილი ტელეკომპანია ”იმედში” პოლიტიკური თოქ-შოუების დახურვას აშშ-დან გამოეხმაურა.

„მე მინდა ვისურვო, რომ ყველა ტელეკომპანიამ დამოუკიდებლად გადაწყვიტოს თავისი პოლიტიკა, არ ჰკითხოს არავის, როცა რაიმე თოქ-შოუს ხსნის და არ ჰკითხოს არავის, როდესაც რაიმე თოქ-შოუს ხურავს. არ მიიღოს არანაირი რჩევები და რეკომენდაციები, რომელი ჟურნალისტი აიყვანოს სამსახურში, ან რომელ ჟურნალისტთან გაწყვიტოს კონტრაქტი. როდესაც საქმე ეხება პოლიტიკურ თოქ-შოუებს, მათი გახსნა, მათი მოდიფიცირება და მათი დახურვაც მყისიერად იძენს ხოლმე გარკვეულ პოლიტიკურ ელფერს და ვისურვებდი, რომ ყველა ამ საკითხში ყველამ შეიტანოს სათანადო სიცხადე, ვისაუბროთ ფაქტებით, არგუმენტებით და გავაგრძელოთ ცხოვრება“- განაცხადა უსუფაშვილმა. პარლამენტის თავმჯდომარის თქმით წინასაარჩევნოდ მსგავსი გადაცემები კი არ უნდა მცირდებოდეს, პირიქით მათი რიცხვი უნდა მატულობდეს:

”ვთვლი, რომ წინასაარჩევნოდ განსაკუთრებით მნიშვნელოვანია, რომ ყველა ტელეარხმა არათუ შეამციროს პოლიტიკურ საკითხებზე დებატების დრო, არამედ გაზარდოს. მაგრამ ვისი მეშვეობით გაკეთდება, რა ფორმატით, რა სტილის გადაცემებით, ამის თაობაზე, ცხადია, თავად ტელეკომპანიები უნდა ჩამოყალიბდნენ,“ - განაცხადა დავით უსუფაშვილმა.