ენმ სერგეენკოს შემწეობის გარეშე დარჩენილი სოციალურად დაუცველთა 280 განცხადებას უგზავნის

პოლიტიკა - 10:59, 31 Aug, 2015

899

„ერთიანი ნაციონალური მოძრაობა“ ჯანდაცვის მინისტრსდავით სერგეენკოს შემწეობის გარეშე დარჩენილი სოციალურად დაუცველი ოჯახების 280 განცხადებას უგზავნის.„ერთიანი ნაციონალური მოძრაობა“, საქართველოს ყველა რაიონში, საარსებო შემწეობის გარეშე დატოვებული ოჯახების აღწერას აგრძელებს და საზოგადოებას პერიოდულად აღწერის შედეგებს აცნობს.

დღეს გამართულ პრესკონფერენციაზე, „ერთიანი ნაციონალური მოძრაობის“ სამოქალაქო საზოგადოებასთან ურთიერთობის მდივანმა, ზურაბ ჭიაბერაშვილმა, სოციალური დახმარების გარეშე დარჩენილი მოქალაქეების განცხადებები წარადგინა და იმ უსამართლობაზე მიუთითა, რასაც დავით სერგეენკო სოციალურად დაუცველი ადამიანების მიმართ სჩადის.

„280 ოჯახი, რომლებმაც განცხადებით „ნაციონალურ მოძრაობას“ მომართეს, უმნიშვნელო ნაწილია იმ ათიათასობით ოჯახისა, რომლებიც ბიძინა ივანიშვილის მმართველობის პერიოდში საარსებო შემწეობის გარეშე დარჩნენ.

შეგახსენებთ, „ქართული ოცნების“ ხელისუფლებაში ყოფნის პერიოდში საარსებო შემწეობის გარეშე დარჩა 27,000 ბავშვი, ასევე 30,000 პენსიონერი, რომელთაგან ნახევარზე მეტი მარტოხელაა.

ზოგადად, 2013 წლის იანვრიდან დღემდე საარსებო შემწეობის მიმღებ პირთა რაოდენობა 506,245-დან 377,971 მოქალაქემდე შემცირდა იმ დროს, როდესაც ივანიშვილის მთავრობის არასწორი ეკონომიკური პოლიტიკის გამო სულ უფრო მეტი და მეტი ოჯახი ვარდება უკიდურეს სიღარიბეში.

აღსანიშნავია, რომ 2014 წლის იანვართან შედარებით, მთავრობა თვეში 4 მლნ ლარით ნაკლებს ხარჯავს გაჭირვებულ ადამიანებზე მაშინ, როდესაც თვეში 30 მლნ ლარით არის გაზრდილი ბიუროკრატიის ხელფასის, პრემიებისა და დანამატების ოდენობა.

„ერთიანი ნაციონალური მოძრაობა მოითხოვს“, დავით სერგეენკომ პირადად განიხილოს აქ წარმოდგენილი განცხადებები და მიიღოს გადაწყვეტილება სოციალურად დაუცველთა ბაზიდან ამოყრილი ოჯახებისთვის საარსებო შემწეობის აღდგენის შესახებ“, - განაცხადა ზურაბ ჭიაბერაშვილმა.