,,რუსეთი უკან იხევს, როცა ხედავს, რომ არ ხარ მიტოვებული“ - შარაშენიძე ნატო-ს საწვრთნელ ცენტრზე

პოლიტიკა - 19:09, 27 Aug, 2015

2057

საქართველოს საზოგადოებრივ საქმეთა ინსტიტუტის პროფესორი, ექსპერტი თორნიკე შარაშენიძე ნატო-საქართველოს წვრთნისა და შეფასების ცენტრის გახსნას მნიშვნელოვან მოვლენად აფასებს. როგორც თორნიკე შარაშენიძემ „ნიუპოსტთან“ საუბარში განაცხადა საქართველოში ნატოს ინფრასტრუქტურის და ჯარისკაცების არსებობა უსაფრთხოების სერიოზული გარანტიაა:

„ჩვენ ტერიტორიაზე არის ნატოს ინფრასტრუქტურა და ეს უკვე არის დაცულობის გარკვეული გარანტი. ჩვენ გაწევრიანებას ჯერჯერობით ვერ ვახერხებთ, მაგრამ თუ ჩვენს ტერიტორიაზე იქნებიან ნატოს წევრი ქვეყნების ოფიცრები და სამხედროები ეს უკვე უსაფრთხოების სერიოზული გარანტიაა.“- აღნიშნა შარაშენიძემ.

ექსპერტმა პრემიერის მიერ გაკეთებულ განცხადებაზეც გააკეთა კომენტარი, შარაშენიშის შეფასებით, პრემიერი იმ ადამიანების გავლენის ქვეშ მოექცა, ვისაც ამ ცენტრის გახსნით რუსეთის გაღიზიანების ეშინოდა და მისი მხრიდან პაციფისტური განცხადება და მრავალჯერადი ხაზგასმა იმისა, რომ ეს ცენტრი არავისთვის საფრთხეს არ წარმოადგენს აქედან გამომდინარეობდა:

„პრემიერი მოექცა იმ ადამიანების გავლენის ქვეშ, ვინც ამ ცენტრის გახსნით რუსეთის გაღიზიანების ეშინოდა და იძულებული გახდა მაქსიმალურად პაციფისტური განცხადება გაეკეთებინა.“- განაცხადა თორნიკე შარაშენიძემ.

შარაშენიძის თქმით, რუსეთმა დაინახა, რომ საქართველო მიტოვებული არაა და ის ამჟამად თვითდამშვიდებას ეწევა, რომ მიუხედავად ცენტრის გახსნისა, საქართველო ნატოს წევრი ვერ გახდება

„ნატოს ცენტრის გახსნასთან დაკავშირებით კივილ-წივილი ატეხეს აქაურმა პრორუსულებმა ძალებმა, რუსეთს კი თვითდამამშვიდებელი რეაქცია ჰქონდა - ცენტრი გაიხსნა, მაგრამ მაინც ვერ შევლენ "ნატო"-ში. როცა რუსეთი ძალას ხედვას და ხედავს რომ მიტოვებული არა ხარ, იხევს უკან .“- აღნიშნა თორნიკე შარაშენიძემ.