ელექტროენერგიაზე ტარიფის გაზრდა კიდევ უფრი რეალური ხდება

პოლიტიკა - 16:06, 27 Aug, 2015

1865

ენერგეტიკის მარეგულირებელ კომისიაში კომპანია „თელასის“ განაცხადის საჯარო განხილვა იმართება. სემეკში „თელასის“ 2015-16 წლების საინვესტიციო გეგმას განიხილავენ. საინვესტიციო გეგმა ტარიფის დაანგარიშების ერთ-ერთი მნიშვნელოვანი ფაქტორია. წინასწარი ინფორმაციით ყველანაირი პირობა არსებობს იმისთვის რომ „თელასმა“ ელექტროენერგიის საფასური გააძვიროს. ამ მოსაზრებას იზიარებს ენერგო ომბუდსმენიც.

„გადაწყვეტილებას იღებს კომისია, რომელიც სამი წევრისგან შედგება, საბოლოო დეტალები ჯერ კიდევ არ არის დაზუსტებული და ახლა უნდა მოვისმინოთ ინვესტიციების პროქტი, რომელიც ძალიან საინტერესოა და ამასთან დაკავშირებით ბევრი მოსაზრებები გვქონდა. წინაპირობა და გარემო არსებობს თუმცა გადაწყვეტილების მიღებაზე უფლებამოსილება კომისიას აქვს“- განაცხადა ენერგოომბუდსმენმა სალომე ვარდიაშვილმა.

სემეკის წარმომადგენლის ზურაბ გაჩეჩილაძის განცხადებითსამომხმარებლო ტარიფის დაანგარიშებისას სემეკი კომპანია „თელასს“ მხოლოდ იმ საინვესტიციო პროგრამებს გაითვალისწინებს, რომელიც მიზანშეწონილი და დასაბუთებული იქნება და მარგი ქმედების კოეფიციენტი მაღალი ექნება.

„ეს არის საჭირო იმისთვის რომ კომპანიამ განახორციელოს უფრო მეტი ინვესტიცია ვიდრე მოხდება ენერგეტიკული აქტივების ამორტიზაცია იგივე პერიოდში. შესაბამისად სემეკი შეითანხმებს ისეთ საინვესტიციო პროგრამებს, რომელიც არის მიზანშეწონილი და დასაბუთებული და შესაბამისად არ შეითანხმებს ისეთ პროგრამებს, რომელთა მარგი ქმედების კოეფიციენტი არის დაბალი მომხმარებლებისათვის მომსახურების გაუმჯობესების მიზნით,"- განაცხადა ზურაბ გაჩეჩილაძემ.

ტარიფთან დაკავშირებით ენერგეტიკის მარეგულირებელმა ეროვნულმა კომისიამ საკუთარი მოსაზრება აგვისტოს ბოლომდე უნდა წარმოადგინოს.

საბოლოო გადაწყვეტილების მისაღებად კი ვადა 18 დეკემბრამდე აქვს.