NATO-ს საქართველოს იმედი აქვს და საქართველოსაც შეუძლია NATO-ს იმედი ჰქონდეს

NATO-ს საქართველოს იმედი აქვს და საქართველოსაც შეუძლია NATO-ს იმედი ჰქონდეს - სტოლტენბერგი

პოლიტიკა - 12:32, 27 Aug, 2015

1436

ჩრდილოატლანტიკური ალიანსის გენერალური მდივნის იენს სტოლტენბერგის განცხადებით, მისთვის დიდი პატივია საქართველოში ვიზიტი და ერთობლივი საწვრთნელი ცენტრის გახსნა. აღნიშნული განცხადება იენს სტოლტენბერგმა პრემიერმინისტრთან შეხვედრის შემდეგ გამართულ პრესკონფერენციაზე გააკეთა. მან ხაზი გაუსვა საერთაშორისო მისიებში საქართველოს აქტიურ მონაწილეობას, მადლობა გადაუხადა საქართველოს ამ მხარდაჭერისთვის და საერთაშორისო მისიებში დაღუპული ჯარისკაცების გამო მწუხარება გამოთქვა:

„საქართველო გახლავთ მტკიცე და სანდო წვლილის შემტანი უსაფრთხოების საკითხებში, ჩვენი თანამშრომლობა მრავალ წელს ითვლის, ჩვენ დღეს დამატებით ვაღრმავებთ ჩვენ საქმიანობას და წვრთნისა და შეფასების ცენტრის გახსნა იქნება ძალიან მნიშვნელოვანი ნაბიჯი,“ - განცხადა სტოლნტერბერგმა. მისი თქმით გასულ წელს მიღებულ არსებით პაკეტს უკვე ხელშესახები შედეგები მოაქვს.

ნატოს გენერალური მდივნის განცხადებით, NATO აფასებს იმ პროგრესს რასაც საქართველომ მიაღწია, ამასთანავე ყურადღებით აკვირდება ქვეყანაში მიმდინარე რეფორმების პროცესს.

„საქართველოს გააჩნია ყველა საჭირო ინსტრუმენტი, რათა წევრობის გზაზე წინ იმოძრაოს და თქვენ ამ ინსტრუმენტებს ეფექტურად იყენებთ, ევროატლანტიკური ინტეგრაცია მარტივი გზა არ გახლავთ, მას სჭირდება დრო, შემართული ძალისხმევა და რეალური ცვლილებების განხორციელება. მე ვიცი, რომ საქართველოს მოსახლეობა და მთავრობა ერთგულია ამ მიმართულების. ძალიან დიდი ყურადღებით ვაკვირდებით რეფორმებს, სასამართლო რეფორმების ჩათვლით და ხაზს ვუსვამ იმ პროგრესს, რომელსაც თქვენმა ქვეყანამ მიაღწია და ასევე აღვნიშნავ, რომ ეს პროგრესი უნდა გაღრმავდეს. NATO-ს საქართველოს იმედი აქვს და საქართველოსაც შეუძლია NATO-ს იმედი ქონდეს,“- განაცხადა ჩრდილოატლანტიკური ალიანსის გენერალურ მდივანმა.