"მელაპარაკებიან, რა უბედურებაა ეს ნეპოტიზმი და მეუბნებიან იქნებ ჩემი შვილი მიიღო სამსახურშიო"

პოლიტიკა - 16:25, 25 Aug, 2015

2621

მთავრობის სხდომის დასრულების შემდეგ რეგიონული განვითარებისა და ინფრასტრუქტურის მინისტრმა მთავრობის სხდომის დასრულების შემდეგ ჟურნალისტებთან ნეპოტიზმის თემაზე ისაუბრა და აღნიშნა, რომ ნეპოტიზმს არაფერი განსაკუთრებული ბრძოლა არ სჭირდება, ჯავახიშვილმა ედუარდ შევარდნაძისდროინდელი მთავრობის სხდომები გაიხსენა, სადაც კორუფციის წინააღმდეგ ბრძოლის კომისიებს ქმნიდნენ.

„ნეპოტიზმს არაფერი განსაკუთრებული ბრძოლა არ სჭირდება. შევარდნაძის პერიოდში მინიმუმ თვეში ორჯერ ვიკრიბებოდით სხვადასხვა თანამდებობის პირები და ვქმნიდით კორუფციის წინააღმდეგ ბრძოლის კომისიებს. შაბათი დღე იყო, მახსოვს, ავდექი მთავრობის სხდომაზე, დავიღალე უბრალოდ და ვუთხარი ყველას, რაზე მსჯელობთ ვერ გავიგე-მეთქი. მთელი ხელისუფლება აქ ვსხედვართ. კორუფცია არის ხელისუფლების მონაწილეობით ჩადენილი დანაშაული, ახლა ჩვენ უნდა შევქმნათ კომისია, რომელიც ჩვენ დაგვაჭრის კუდებს-მეთქი. ორშაბათს დილას უნდა ავდგეთ, ჩავირტყათ ხელებზე, მოდი აღარ ავიღებთ ქრთამსო და დამთავრდა კორუფცია ამით? ჩაიხედოს ყველამ თავის გულში. დავანებოთ თავი ხელისუფლების წარმომადგენლებს.

დავიღალე - რიგითი ადამიანებისგან, ჩემი მეგობრებისგან, ახლობლებისგან, ნახევარი საათი მელაპარაკებიან, რა საშიში უბედურებაა ეს ნეპოტიზმი და ბოლო წინადადებად მეუბნებიან იქნებ ჩემი შვილი მიიღო სამსახურშიო. ნეპოტიზმი ჩვენში ყველაში ზის. თანამდებობის პირმა რამდენს უნდა გაუძლოს? არ ვიხსნი პასუხისმგებლობას. დიახ, უნდა გაუძლოს, რადგან თანამდებობის პირია, მაგრამ თუ ეს ნეპოტიზმი არ გინდათ, კაცო, ნურავის სთხოვთ, მიმიღეთ სამსახურში, არ შეიძლება?“ - განაცხადა ნოდარ ჯავახიშვილმა.