ვადამდელი არჩევნების მოთხოვნას არ ეთანხმება ,,დემოკრატიული განვითარების ეროვნული ცენტრის“ ხელმძღვანელი მუხრან ბურჭულაძე, რომელიც მიიჩნევს, რომ უმჯობესია ქვეყანა რადიკალიზმის გარეშე მივიდეს 2016 წლის არჩევნებამდე. ბურჭულაძე ფიქრობს, რომ შუალედური არჩევნების ბოიკოტი არ არის სწორი ფორმა, რადგან მოქალაქეებს უნდა მიეცეთ ჯანსაღი არჩევანის გაკეთების საშუალება.

,,ჩვენ უნდა შევძლოთ და მივიდეთ 2016 წლის არჩევნებამდე. კარგად მესმის იმ კრიზისის მნიშვნელობა, რომელშიც ჩვენი ქვეყანა იმყოფება, მაგრამ გვმართებს მოთმინება, რადგან ჩვენს უკან სახელმწიფოა! წინ ახალი პოლიტიკური სეზონია და საზოგადოებას სჭირდება საარჩევნოდ მომზადება, ისევე როგორც პოლიტიკურ სპექტრს, ამიტომ ყოველგვარი რადიკალიზმი და შუალედური არჩევნების ბოიკოტირება მიუღებელია. საპარლამენტო არჩევნებამდე თითქმის წელიწადი რჩება და უნდა გამოვიჩინოთ მოთმინება. დღეს ვადამდელი არჩევნების მოთხოვნა საღ აზრს მოკლებულია, რადგან ეს არ წაადგება სახელმწიფოს. მოქალაქეებს უნდა მიეცეთ ჯანსაღი კონკურენციის პირობებში არჩევანის გაკეთების შესაძლებლობა. თუ გვსურს თანამედროვე სტანდარტების სახელმწიფოს და დემოკრატიის შენება, არ უნდა ვეცადოთ ამომრჩევლის დილემის წინაშე დაყენება, ჩვენ მას უნდა მივცეთ შედარების გაკეთების საშუალება. ჩემთვის გასაგებია ზოგიერთი პოლიტიკოსის მოუთმენლობა, მაგრამ საქართველომ აირჩია ევროპული გზა, დემოკრატია კი მსხვერპლს მოითხოვს, ამიტომაც არ უნდა დავუშვათ მაგალითი იმისა, რომ ძალაუფლების სურვილმა გადაწონოს ფუნდამენტური ფასეულობები. მოვუწოდებ ყველა პოლიტიკურ პარტიას, უკან გადავდოთ პირადი ინტერესები და კონცენტრირება ჩვენი მოქალაქეების მომავალზე მოვახდინოთ, საფუძველი ჩავუყაროთ ჯანსაღ კონკურენციას სადაც არჩევანი კარგსა და უკეთესს შორის კეთდება და არა უალტერნატივო გარემოს. ბოიკოტირებას საარჩევნოდ მომზადება და შრომა სჯობს“ - წერს მუხრან ბურჭულაძე სოციალურ ქსელში.