„ბედნიერია ის თაობა, რომელიც ყველაფრის მიუხედავად, შექმნის ასეთივე ღირებულს როგორიც ენგურჰესია“

პოლიტიკა - 18:07, 21 Aug, 2015

1843

ვიცე-პრემიერისა და ენერგეტიკის მინისტრის კახა კალაძის განცხადებით, მდინარე ენგური თავისი უდიდესი ჰიდროპოტენციალით ჯერ კიდევ გასული საუკუნის დასაწყისში იპყრობდა ყურადღებას.

ეს განცხადება ვიცე პრემიერმა დღეს ენგურჰესის თაღოვანი კაშხლისთვის კულტურული მემკვიდრეობის ძეგლის სტატუსის მინიჭების ცერემონიალზე გააკეთა.

„მოგეხსენებათ 2015 წელს ევროსაბჭოს და იუნესკო-ს გადაწყვეტილებით ევროპული კულტურის მემკვიდრეობის დღეების მთავარი თემა ინდუსტრიული მემკვიდრეობა იქნება. და საქართველოსთვის, ჩვენი მოქალაქეებისთვის დიდი პატივია, რომ ენგურჰესი ამ სიაში მოხვდა. ჩვენ ვიმყოფებით ქართული ინჟინერიის , ეროვნული ჰიდრომშენებლობის უნიკალურ ძეგლთან - ენგურის კაშხალთან. ეს მდინარე თავისი უდიდესი ჰიდროპოტენციალით , ჯერ კიდევ გასული საუკუნის გარიჟრაჟზე იპყრობდა ყურადღებას. დიდი ნიკო ნიკოლაძის, საზოგადო მოღვაწის, პოლიტიკოსის, პუბლიცისტის რეალიზებული, ასრულებული ოცნებაა ის , რასაც დღეს ძეგლის სტატუსს ვანიჭებთ... და ეს სიამაყით, სრულფასოვნების შეგრძნებით აღავსებს თითოეულ ჩვენგანს“, - განაცხადა კალაძემ.

მან დღევანდელი დღე მიულოცა ყველას, ვისაც ენგურჰესთან შეხება ჰქონია.

„გილოცავთ ყველას, ვისაც შეხება გქონიათ ენგურჰესთან, ვინც ეს ძეგლი აჩუქეთ ამჯერად უკვე კაცობიობას და დიდი მადლობა ყველას, ვინც დააფასა ქართული ჰიდროინჟინერიის ეს შესანიშნავი ქმნილება და მსოფლიოში გაუთქვა სახელი. გისურვებთ წარმატებებს, გისურვებთ დიდი და საშვილიშვილო პროექტების განხორციელებას ან მასში მონაწილეობას და რაც მთავრია ვუსურვებ ყველას მშვიდობას და აღმშენებლობას“, - აღნიშნა კალაძემ.

კახა კალაძის განცხადებით, ქვეყანაში არსებული ჰიდროპოტენციალის ათვისება იმდენად გონივრულად უნდა მოხდეს, რომ ენგურჰესის მსგავსი ობიექტი მომავალი თაობებისთვის პროფესიონალიზმის მაჩვენებელი გახდეს.

„ჩვენ ენერგეტიკის განვითარება უნდა განვაგრძოთ ამ მიმართულებით - გონივრულად ავითვისოთ ქვეყანაში არსებული ჰიდროპოტენციალი, იმდენად გონივრულად, რომ თითოეული მსგავსი ობიექტი მომავალი თაობებისთვის გახდეს ჩვენი დამსახურების და პროფესიონალიზმის მაჩვენებელი“, - განაცხადა ვიცე-პრემიერმა.

მისივე თქმით, ბედნიერია ის თაობა, რომელიც ყველაფრის მიუხედავად, შექმნის ასეთივე ღირებულს და დასაფასებელს , როგორი ენგურჰესია.

„იცვლება თაობები, მთავრობები, პოლიტიკური განწყობები ქვეყანაში.... ეს პროცესი მუდმივ დინამიკაშია და ბედნიერია ის თაობა, რომელიც ყველაფრისდამიუხედავად, ნებისმიერი იდეოლოგიის, პოლიტიკური თუ კონფრონტაციული ფონის მიუხედავად, შექმნის ასეთივე ღირებულს და დასაფასებელს , როგორი ენგურჰესია. ჩვენც უნდა შევიტანოთ წვლილი თანამედროვე საქართველოს ისტრიული დოვლათის შექმნაში“ , -აღნიშნა კალაძემ.