"ეს არ არის NATO-ს საწვრთნელი ბაზა, ეს არის სასწავლო ცენტრი"- პრემიერი

პოლიტიკა - 14:50, 19 Aug, 2015

1946

ბათუმში ვიზიტად მყოფმა ირაკლი ღარიბაშვილმა ჟურნალისტებთან ნატოს გენერალური მდივნის იენს სტონტელბერგის აგვისტოს ბოლოს დაგეგმილი ვიზიტის შესახებ და საქართველოში ნატოს სასწავლო ცენტრის გახსნასთან დაკავშირებით ისაუბრა. ღარიბაშვილის თქმით მიმდინარეობს სპეკულაციები იმასთან დაკავშირებით, რომ საქართველოში არა სასწავლო ცენტრი, არამედ ნატოს საწვრთნელი ბაზა იხსნება.

"თქვენ იცით, რომ ერთი კვირის შემდეგ ნატო-ს გენმდივანი ჩამოდის საქართველოში. ჩვენ ვხსნით სასწავლო ცენტრს. ბევრი სპეკულაციები იყო ამ ცენტრთან დაკავშირებით, რომ ეს არის საწვრთნელი ბაზა და ა.შ. ეს არ არის საწვრთნელი ბაზა. ეს არის სასწავლო ცენტრი ჩვენი ჯარისკაცებისთვის, რომ ჩვენი ჯარისკაცები მოვამზადოთ და მათი მომზადების დონე აიწიოს, რომ ნატო-ს სტანდარტებთან შესაბამისობაში იყოს. მინდა გითხრათ, რომ ყოველგვარი სპეკულაციები არის გადაჭარბებული. ჩვენ მივესალმებით ნატო-ს გენმდივნის ვიზიტს საქართველოში. ჩვენთვის ეს არის ძალიან დიდი პატივი. ჩვენ მივყვებით იმ გეგმას, რომელიც მივიღეთ უელსის სამიტზე და ჩვენ ამ გეგმას კარგად ვასრულებთ. ამ ცენტრს რაც შეეხება, ეს არის სასწავლო ცენტრი. ასეთი ცენტრი უკვე გვაქვს საქართველოში საჩხერის ბაზაზე", - აღნიშნა ირაკლი ღარიბაშვილმა.