„თავისუფალი საქართველოს“ ლიდერი კახა კუკავა ამბობს, რომ „რუსთავი 2“-თან დაკავშირებით საზოგადოება ორივე მხარისგან ნახევრად სიმართლეს ისმენს.

როგორც კუკავამ „ნიუპოსტთან“ საუბრისას განაცხადა, რეალურად დამოუკიდებელი ტელეკომპანიების რეკეტი დაიწყო „ნაციონალურმა მოძრაობამ“, ხოლო დღევანდელი ხელისუფლება ამ პრაქტიკას აგრძელებს.

„რუსთავი 2“-თან დაკავშირებით ორივე მხარე ცდილობს საზოგადოებას ნახევრად სიმართლე მიაწოდოს, რაც საზოგადოებას აღიზიანებს. აუცილებელია ითქვას სიმართლე მთლიანობაში. სიმართლე მდგომარეობს იმაში, რომ დამოუკიდებელი ტელეკომპანიების ჯიჯგვნა და რეკეტი დაიწყო წინა ხელისუფლებამ. ეს პრაქტიკა დაამკვიდრა „ნაციონალურმა მოძრაობამ“. მათი მსხვერპლი არა მარტო „რუსთავი 2“, არამედ სხვა ტელეკომპანიებიც გახდნენ. დღევანდელმა ხელისუფლებამ „ნაციონალური მოძრაობის“ პრაქტიკა გააგრძელა, თუმცა შერბილებული ფორმით. ხელისუფლებამ გადაწყვიტა, მანაც დაამყაროს კონტროლი „რუსთავი 2“-ზე. ეს არის სიმართლე“, - ამბობს კუკავა.