კარბელაშვილი ბოდიშს კიდევ ერთხელ იხდის და მზადაა სადეპუტატო მანდატზე უარი თქვას

პოლიტიკა - 22:12, 13 Aug, 2015

3556

საპარლამენტო უმცირესობის წევრი გიორგი კარბელაშვილი 9 აგვისტოს მომხარი ინციენტის გამო ბოდიშს კიდევ ერთხელ იხდის და აცხადებს, რომ საჭიროების შემთხვევაში მზადაა სადეპუტატო მანდატი დათმოს. დეპუტატმა დღეს სამხარაულის ექსპერტიზის ბიუროს სამედიცინო ცნობაც გაასაჯაროვა, რომლის მიხედვითაც კარბელაშვილს ნარკოტიკული ზემოქმედება არ დაუდგინდა.

"მინდა კიდევ ერთხელ გამოვეხმაურო 9 აგვისტოს მომხდარ ფაქტს და კიდევ ერთხელ მოვიხადო ბოდიში ჩემი საქციელის გამო, რადგან ნასვამი მანქანის მართვა და პოლიციელებისათვის დაუმორჩილებლობა მითუმეტეს პარლამენტარისათვის სრულიად შეუფერებელი საქციელია. მრცხვენია ჩემი საქციელის გამო და ვგრძნობ პასუხისმგებლობას საკუთარი ამომრჩევლების, საკუთარი კოლეგების, საზოგადოების წინაშე და როგორც მამა, ჩემი შვილების წინაშე. სწორედ ამ პასუხისმგებლობის გამო მზად ვარ საჭიროების შემთხვევაში დავტოვო პარლამენტი და უარი ვთქვა სადეპუტატო მანდატზე. აქვე მინდა გამოევხმაურო ღარიბაშვილის განცხადებას, რომ მე თითქოს ნარკომანი, კრიმინალი და თავზეხელაღებული ვარ, ეს არის სამხარაულის ექსპერტიზის ბიუროს ცნობა, რომლის თანახმადაც მე არც 9 აგვისტოს, ინციდენტის დროს და არც არასდროს არ ვყოფილვარ ნარკოტიკული ნივთიერების ზემოქმედების ქვეშ. სწორედ ამ ოფიციალური ცნობის საფუძველზე კატეგორიულად ვითხოვ ღარიბაშვილისგან ბოდიშის მოხდას, რადგან მან ჩემი ღირსება შეურაცხყო,"-აცხადებს გიორგი კარბელაშვილი.