"ცემით, ხელ-ფეხის და სახის გაკავებით აიძულებენ ეზიარონ"- რა ისტორიას ჰყვება პეტრე კოლხი

სოც.მედია - 17:34, 13 Aug, 2015

15703

სვეტიცხოვლის საკათედრო ტაძრის დეკანოზი პეტრე კოლხი მასთან მისული ახალგაზრდა გოგონას ისტორიას ყვება, როგორც სასულიერო პირი აღნიშნავს გოგონა თითქმის 10 წელია მრევლის წევრია, თუმცა სულიერი სიმშვიდე, მაინც ვერ იპოვა, რადგამ მისი ახლობლები მას უამრავ აკრძალვას უწესებენ:
"გოგონა მომადგა, ალბათ 18-ის იქნებოდა. ისეთი შეფუთული, სიცხისგან გული შემიწუხდა. გარეგნული მდგომარეობით ეტყობოდა, ოჯახის ან რომელიმე ახლობლის მსხვერპლი იყო. მისი ამ შედეგით იტანჯებოდა, შეიძლება ითქვას, უკვე ღვთის გმობაში იყო. არც სახლში, არც სხვაგან არ მაქვს უფლება ჩემს ტკივილზე ვისაუბრო და გავთავისუფლდეო. რვა წლის ასაკიდან ტაძარში მიუყვანიათ. (ამაში არაფერია ცუდი, პირიქით, ღვთის გზაზე უფრო დაცული ხარ და მშობლები ცდილობენ ნაადრევი ასაკიდან სარწმუნოებას აზიარონ შვილები) თითქმის ათი წელია აღმსარებელი და მრევლი ჰქვია, ლოცულობს, მარხულობს, კანონებს ზედმიწევნით კარგად ასრულებს და სულს სიმშვიდე მაინც არ შეეხო. იმდენად გაუსაძლისი მდგომარეობა შეექმნა, მეშინია ფატალურად არ დაამთავროს სიცოცხლე. ყვება საოცარ ისტორიებს. სასულიერო პირებზე ისე საუბრობს, გეგონება დახლებთან მდგარი ვაჭრების ყოველდღიურ განცდებს ისმენ. პატარა ასაკში მისგან დამოუკიდებლად მიიყვანეს. ახლა კი სხვა სურვილები გაუჩნდა. სურს სწავლა განაგრძოს, მუსიკაზე იაროს, შეყვარებული ჰყავდეს, გაიღიმოს და სიცოცხლე უხაროდეს. აშინებენ, ასეთი აზრები ეშმაკისგან მოდის და დაითმინეო. ვატყობ, ლოცვაც, მარხვაც, ე.წ. სულიერება შესძულდა, ყველა დეტალი ვალდებულებაში გადაეზარდა, ღმერთს შინაგანად დაშორდა... ტაძარში სიარულის მიუხედავად თვლის, რომ ღმერთთან არ დადის. ღმერთსა და გოგონას შორის გაურკვეველი შიში და აკრძალვები ჩადგა. ის არაფერს განსაკუთრებულს არ ითხოვდა. ადამიანური ცხოვრება მოისურვა და წინ აღუდგნენ, მონურად იცხოვრეო. რისი გაკეთებაც შეიძლება, ისიც თუ ამიკრძალეს, მეშინია საერთოდ უარესი არ ჩავიდინოო, მითხრა. არ ვიცი, რამდენად შევძელი მისი დამშვიდება, მაგრამ მე მოსვენება დავკარგე.
დავშორდი და ზიარების პროცესი გამახსენდა... ბავშვებს რიგში რომ ჩააყენებენ, ცემით, აგრესიით, ხელ-ფეხის და სახის გაკავებით აიძულებენ ეზიარონ. მშობლები კმაყოფილები ბრუნდება შინ, გვერდით ,,ნაზიარები" შვილები რომ მოყვებიან, მაგრამ არავინ კითხულობს, რას ეზიარნენ?! გამახსენდა თავისუფლების სიმბოლოს, იესოს ქრისტეს სიტყვებიც: ,,წყალობა მნებავს და არა მსხვერპლი"!...- წერს პეტრე კოლხი სოციალურ ქსელში.