„თავისუფალი დემოკრატების“ ერთ-ერთი ლიდერი ალექსი პეტრიაშვილი ე.წ. „კაბელების საქმეში“ ბრალდებულების თავდაცვის სამინისტროში დაბრუნების ფაქტს დადებითად აფასებს.

პეტრიაშვილი სოციალურ ქსელში წერს, რომ მინისტრმა, თინა ხიდაშელმა მართებული გადაწყვეტილება მიიღო.

„1. არასდროს მოვრიდებივარ და არც ეხლა დავიშურებ საქებარ სიტყვებს, როცა სწორი გადაწყვეტილებები მიიღება: ისევე როგორც დეპუტატობის დროს, თავდაცვის მინისტრმა მიიღო მართებული გადაწყვეტილება, რასაც გულწრფელად მივესალმები!

2. პასუხისმგებლობის საკითხია - ხალხი უდანაშაულოდ, უსამართლოდ ციხეში იჯდა 8 თვე! პროკურატურის პირველ რიგში! ასევე მათაც უნდა გაიზიარონ პოლიტიკური პასუხისმგებლობა, ვინც ამტკიცებდა, რომ კორუფციული სქემით მილიონები იყო მიტაცებული!

3. იმედს გამოცთქვამ, რომ ხუთივე ადამიანს საჯაროდ მოუხდიან ბოდიშს და აუნაზღაურებენ მორალურ და მატერისლურ ზარალს!

4. ვულოცავ პირველ რიგში ამ ღირსეულ ადამიანებს და მათ ოჯახებს! ასევე, ყველა თავისუფალ დემოკრატს! ყოველთვის ღირს ბრძოლა ბოლომდე სიმართლისთვის!“, - წერს პეტრიაშვილი.

შეგახსენებთ, რომ თავდაცვის სამინისტროს ყოფილ მაღალჩინოსნებს 4 მილიონზე მეტი სახელწმიფო თანხის გაფლანგვისთვის აქვთ ბრალი წარდგენილი. ისინი სასამართლომ პირადი თავდების საფუძველზე გაათავისუფლა. თავდებში არიან პოლიტიკოსები და სავარაუდოდ თავდაცვის მინისტრიც.