აფხაზეთის დე ფაქტო საგარეო უწყება საქართველოს ხელისუფლებას სიცრუის პროპაგანდაში ადანაშაულებს

პოლიტიკა - 11:33, 12 Aug, 2015

2815

ოკუპირებული აფხაზეთის დე ფაქტო საგარეო საქმეთა სამინისტრო საქართველოს ხელისუფლებას აფხაზეთის წინაამღმდეგ მიმართულ პროპაგანდაში და საერთაშორისო იმიჯის შელახვაში ადანაშაულებს.

დე ფაქტო უწყებამ კომენტარი საქართველოს საგარეო საქმეთა სამინისტროს ანგარიშთან დაკავშირებით გააკეთა, რომელიც ოკუპირებულ ტერიტორიებზე ადაიანის უფლებების მდგომარეობას ეხებოდა. აფხაზური მხარის პროტესტს იწვევს ის ფაქტი, რომ დოკუმენტში აფხაზეთი და ოსეთი ოკუპირებულ ტერიტორიებად არის მოხსენიებული. ამასთანავე მათი თქმით ქართული მხარე ფაქტების ფალსიფიცირებას ახდენს, როდესაც აცხადებს, რომ აფხაზეთიდან საომარი მოქმედებების დროს დევნილად 430 ათასი ადამიანი იქცა, მათი თქმით 1989 წლის აღწერის მიხედვით აფხაზეთის მოსახლეობა 525 ათას ადამიანს შეადგენდა, საიდანაც ეთნიკური ქართველი 240 ათასი იყო. მათი განცხადებით კონფლიქტის შედეგად დევნილად ქცეული ადამიანების რიცხვი არ შეიძლება აჭარბებდეს ამ რაოდენობას. ამასთანავე აფხაზეთის დე ფაქტო უწყების თქმით, გალის რაიონში 60 ათასი დევნილი უკან დაბრუნდა. უწყება ასევე უარყოფს ენგურის ხიდზე გალის მაცხოვრებლების მოძრაობასთან დაკავშირებით შექმნილ პრობლემებსაც.

აფხაზეთის დე ფაქტო საგარეო საქმეთა სამინისტროს განცხადებით, საქართველო და მისი პარტნიორები ევროკავშირიდან თავად არღვევენ ადამიანის უფლებებს, იმის გამო რომ ისინი არ აძლევენ აფხაზეთის მაცხოვრებლებს თავისუფალი გადაადგილების, განათლების და კვალიფიციური სამედიცინო მომსახურების მიღების საშუალებას. ამასთანავე დე ფაქტო უწყება აპროტესტებს იმ ფაქტსაც, რომ საქართველო ცდილობს კონფლიქტის მხარედ არა აფხაზეთი და საქართველო, არამედ რუსეთი და საქართველო წარმოაჩინოს.

„ჩვენ ვთვლით, რომ საქართველოს საგარეო საქმეთა სამინისტროს აღნიშნული ანგარიში არ ასახავს რეალობას, ატარებს მიკერძოებულ ხასიათს და მიზნად ისახავს საერთაშორისო საზოგადოების შეცდომაში შეყვანას. დოკუმენტი ეწინააღმდეგება ჟენევის დისკუსიების სულისკვეთებას და შეიძლება დააზიანოს ის მრავალწლიანი ძალისხმევა, რასაც მხარეები და მედიატორები კონფლიქტის მოგვარებასთან დაკავშირებით უკვე მრავალი წელია იჩენენ“- აღნიშნულია აფხაზეთის დე ფაქტო საგარეო უწყების განცხადებაში.