,,რუსეთს სურს ან ბოლომდე იხეიროს ან მიიღო კონკრეტული დაპირებები ამ მთავრობის მიერ“

,,რუსეთს სურს ან ბოლომდე იხეიროს ან მიიღო კონკრეტული დაპირებები ამ მთავრობის მიერ“ - შაშკინი

პოლიტიკა - 19:49, 11 Aug, 2015

1618

საოკუპაციო ბანერის გადმოწევას სოციალურ ქსელში ეხმაურება თავდაცვის ყოფილი მინისტრი დიმიტრი შაშკინი:

,,ახლა რასაც დავწერ არის ჩემი სუბიექტური მოსაზრება და ეყრდნობა მხოლოდ ლოგიკას და კრიტიკულ აზროვნებას.

ყველა, ვინც ერკვევა შიდა პოლიტიკურ პროცესებში და საგარეო პოლიტიკაში, დამეთანხმება, რომ ძნელად წარმოსადგენია, რომ ახლო მომავალში საქართველოში იყოს მთავრობა, რომელიც რუსეთისთვის ისეთივე კომფორტული იქნება, როგორც ამჟამინდელი.

ამ მთავრობამ გაუღო კარი და არ უშლის რუსული იდეოლოგიური მანქანის მუშაობას საქართველოში, ამ მთავრობამ გაუშვა ციხეებიდან რუსეთის ჯაშუშები, ეს მთავრობა დევნის, რუსეთის აზრით მათ #1 მტერს მიხეილ სააკაშვილს, ამ მთავრობის პოლიტიკის შედეგად, საქართველო გაქრა საერთაშორისო პოლიტიკის რადარებიდან, დე-ფაქტო დაპაუზებულია ქვეყანა, ნატოში და ევროკავშირში ინტეგრაცია და ასე შემდეგ.

მიუხედავად ამისა, ბოლო პერიოდში რუსეთმა გააათმაგა ზეწოლა საქართველოზე. და თუ ამას შეხედავთ შიდა პოლიტიკური კუთხით დაინახავთ, რომ ეს პირდაპირ ურტყამს ამ მთავრობის რეიტინგს, რადგან ოცნების ერთ-ერთი მთავარი დაპირება იყო რუსეთთან ურთიერთობის დალაგება. ამის ნაცვლად, ჩვენ მივიღეთ დე-იურე ანექსია აფხაზეთის და ცხინვალის, ყოველკვირეულ რეჟიმში ოკუპაციის ხაზის გადაწევა, ფართომასშტაბიანი რუსული წვრთნები აფხაზეთში და ცხინვალში, თრუსოს ხეობის ოკუპაციის მუქარა. ბოლო დღეებში ამას დაემატა ახალი ემბარგოს მუქარა მედვედევის მხრიდან და აფხაზეთში რკინიგზის ფორსირებული აღდგენა.

ამ არალოგიკურ სიტუაციას აქვს ორი ახსნა: ან რუსეთმა გადაწყიტა რომ ბოლომდე იხეიროს მომენტით და საქართველოს კონფორმისტული მთავრობის პირობებში მაქსიმალური სარგებელი ნახოს თავისთვის, მაგრამ ამითი ის ბუნებრივია ამოკლებს ამ მთავრობის დღეებს, ან რაღაც მომენტში რუსეთმა მიიღო კონკრეტული დაპირებები აფხაზეთის რკინიგზის აღდგენასთან და ევრაზიულ კავშირთან მიმართებაში, რომელიც მოგვიანებით ვერ შესრულდა ამ მთავრობის მიერ.

პრინციპში, პუტინს ახასიათებს ესეთი სადამსჯელო მოქმედებები და მე ვფიქრობ, მალე ჩვენ დავინახავთ რომელი ვარიანტი სწორეა...“ - წერს შაშკინი.