ე.წ. „კორტების სპეცოპერაციის“ საქმეზე დღეს იმდროინდელი მთაწმინდის რაიონის კრიმინალური პოლიციის სამმართველოს ხელმძღვანელი ალექსანდრე გულაღაშვილი დაიკითხა. მოწმემ დაცვის მხარის კითხვაზე თუ რომელ საათზე იმყოფებოდა ის კორტების მიმდებარე ტერიტორიაზე, უპასუხა, რომ დაახლოებით 09:00 სთ-ზე.

დადგენილია, რომ სპეცოპერაცია 09:45 სთ-ზე დაიწყო. მოწმე ალექსანდრე გულაღაშვილმა დააზუსტა, რომ მას, როგორც მთაწმინდის რაიონის კრიმინალური პოლიციის ხელმძღვანელ პირს და არც მის უშუალო ხელმძღვანელს თამაზ ვასაძეს, აღნიშნულ ტერიტორიაზე სპეცოპერაციის ჩატარების შესახებ ინფორმაცია არ ჰქონდათ. თუ სპეცოპერაციის ჩატარება აღნიშნულ ტერიტორიაზე იქნებოდა დაგეგმილი, მას თუ არა, მის უშუალო ხელმძღვანელს, თამაზ ვასაძეს აუცილებლად ექნებოდა ინფორმაცია. მოწმის თქმით, აღნიშნულის შესახებ მისმა უშუალო ხელმძღვანელმა ინფორმაცია სწორედ მისგან სპეცოპერაციის ჩატარების შემდგომ მიიღო.

აღსანიშნავია, რომ დღემდე დაკითხული პროკურატურის არცერთი მოწმე არ ადასტურებს, რომ სპეცოპერაცია კორტების ტერიტორიაზე უნდა ჩატარებულიყო.