დასავლეთმა საქართველოს შეიარაღება განაახლა - საჰაერო თავდაცვითი სისტემების შესახებ შეთანხმება მიღწეულია

პოლიტიკა - 13:06, 10 Aug, 2015

2587

პირველად 2008 წლის შემდეგ დასავლეთმა საქართველოს შეიარაღება განაახლა. სტატიას აღნიშნული სათაურით gcssi.org-ზე გამოქვეყნდა. მაიკლ მოსკინის სტატიაში საუბარია იმ ხელშეკრულების შესახებ, რომელიც საქართველოს თავდაცვის მინისტრმა ფრანგულ მხარესთან გააფორმა. როგორც სტატიაშია აღნიშნული საქართველომ შეთანხმებას ხელი ფრანგულ კომპანია Matra BAE Dynamics Alenia (MBDA)-სთან მოაწერა, რომელიც სარაკეტო სისტემების წამყვანი ევროპული დეველოპერი და მწარმოებელია, მათ შორის მოკლე და საშუალო სპექტრის “air-to-air”, “ground-to-air”, “air-land” სისტემების. როგორც თავდაცვის უწყების ხელმძღვანელი თინათინ ხიდაშელმა განაცხადა საჰაერო თავდაცვის სისტემების შესახებ მიღწეული შეთანხმების განხორციელება მომავალი წლის 1 იანვრიდან დაიწყება. ხიდაშელის თქმით საქართველო ამ შეთანხმებით შეიძენს ყველაზე თანამედროვე და საუკეთესო ხარისხის საჰაერო თავდაცვის სისტემებს. მინისტრის თქმით აღნიშნულ შეთანხმებასთან დაკავშირებით ორი ეტაპი უკვე გავლილია, ხიდაშელი საფრანგეთს გვიან შემოდგომაზეც ეწვევა კიდევ ერთი შეთანხმების გასაფორმებლად. როგორც სტატიაშია აღნიშნული MBDA არ შეიძლება ჩაითვალოს სუფთა ფრანგულ კომპანიად, რადგან მას ასევე მჭიდრო კონტაქტები აქვს გერმანიასთან, იტალიასთან და დიდ ბრიტანეთთან, სტატიის ავტორის თქმით აღნიშნული კომპანიის და საქართველოს შეთანხმება შესაძლოა განხილული იქნეს როგორც ევროკავშირის პოლიტიკური ნების გამოვლინება.