თბილისის მერმა დავით ნარმანიამ, დედაქალაქის მთავრობის წევრებთან ერთად, მუხათგვერდის ძმათა სასაფლაოზე ომში დაღუპული გმირების ხსოვნას პატივი მიაგო და მემორიალი გვირგვინით შეამკო.

დავით ნარმანია ომში დაღუპულთა ოჯახის წევრებს შეხვდა და მიუსამძიმრა.

"დღევანდელი დღე თითოეული ჩვენგანისთვის არის ძალიან მძიმე და რამდენი ხანიც არ უნდა გავიდეს, თითოეული ჩვენგანის ვალია, რომ ყოველთვის მოვიდეთ აქ და გავიხსენოთ ჩვენი გმირები, ის ბიჭები, რომლებმაც საკუთარი სიცოცხლე გაწირეს იმისათვის, რომ ჩვენი ქვეყანა ყოფილიყო უფრო მეტად თავისუფალი და ჩვენი შვილებისთვის უფრო უკეთესი. უნდა ვანუგეშოთ მათი ახლობლები და გვერდში დავუდგეთ მათ", - განაცხადა დავით ნარმანიამ.

დღეს რუსეთ-საქართველოს 2008 წლის აგვისტოს ომიდან შვიდი წელი გავიდა. 2008 წლის აგვისტოს ომში დაიღუპა 170 სამხედრო პირი, საქართველოს 228 მშვიდობიანი მოქალაქე, 14 პოლიციელი, დაიჭრა 1 747 ადამიანი.