პრეზიდენტმა გიორგი მარგველაშვილმა მუხათგვაერდის სასაფლაოზე 2008 წლის აგვისტოს ომში დაღუპულთა ხსოვნას პატივი მიაგო. მან გარდაცვლილთა ოჯახებს კიდევ ერთხელ მიუსამძიმრა.

პრეზიდენტის თქმით, საქართველო იქნება მთლიანი, ძლიერი სახელმწიფო და ეს მოხდება არა ადამიანების სიცოცხლის ფასად, არამედ იმ ერთიანი პოლიტიკით, რომელშიც უნდა იყოს გაერთიანებული აბსოლუტურად ყველა.

„თქვენ იცით, რომ წლის დასაწყისში ჩვენ ქართული საზოგადოების, პოლიტიკური პარტიების და არასამთავრობოების შიგნით დავიწყეთ დისკუსიების და კონსულტაციების გამართვა იმასთან დაკავშირებით, თუ რაში უნდა ვიყოთ ყველანი აბსოლუტურად გაერთიანებული. როგორ ზუსტად, კორდინირებულად ვაწარმოოთ ერთიანი პოლიტიკა, საქართველოს გაერთიანებასთან დაკავშირებით, განურჩევლად იმისა, რომელ კოალიციას და პარტიას მივეკუთვნებით. ეს პროცესი გრძელდება და მას აუცილებლად ექნება წარმატება. საქართველო უნდა გაერთიანდეს, გაერთიანდეს არა დაპირისპირების, არამედ სიყვარულისა მეგობრობის ხარჯზე და ფასად“, - აღნიშნა პრეზიდენტმა.