ოკუპირებული აფხაზეთის ტერიტორიაზე, პრიმორსკი-გაგიდის მონაკვეთთან რუსი ოკუპანტების მიერ რკინიგზის გაწმენდითი სამუშაოების დაწყებას შერიგებისა და სამოქალაქო თანასწორობის საკითხებში სახელმწიფო მინისტრი ეხმაურება.

პაატა ზაქარეიშვილის თქმით, მოლოდინის საფუძველი, რომ აფხაზეთის რკინიგზაზე მალე მატარებელი გაივლის, არ არსებობს.

„შესაბამისად, ამ თემის წამოწევის მიზანი იგივეა, რაც ბანერებისა და მავთულხლართების განთავსებისა - იყოს ქართული საზოგადოების ნაწილი მუდმივი რეაგირების რეჟიმში. საქართველოს წინააღმდეგ რუსეთს სხვა არაფერი დარჩენია, გარდა არარსებული პროექტების რეანიმაციისა. იმედია, ქართული საზოგადოების ნაწილი ამჯერად მიხვდება, რომ ამგვარი პროექტები ფუჭია და ვერ მიაღწევს ქართულ საზოგადოებაში დაძაბულობის შექმნას", - განაცხადა ზაქარეიშვილმა.

ოკუპირებული აფხაზეთის ტერიტორიაზე, პრიმორსკი-გაგიდის მონაკვეთთან რუსმა ოკუპანტებმა რკინიგზის გაწმენდითი სამუშაოები დაიწყეს. „ნიუპოსტის“ ინფორმაციით, ოკუპანტებს გადაწყვეტილი აქვთ, რომ იქ აღდგეს საბჭოთა კავშირის დროინდელი დისლოცირების ბაზა.