სვეტიცხოვლის ტაძრის დეკანოზმა პეტრე კოლხმა სოციალურ ქსელში საკუთარი ქალიშვილის ფოტოები გამოაქვეყნა, რომელსაც სოციალურ ქსელში სხვადასხვა გამოხმაურება მოჰყვა.

ბევრმა დეკანოზი ამის გამო გააკრიტიკა. ზოგი იმასაც წერდა, რომ მღვდელმა მსგავსი ფოტოები სოციალურ ქსელში არ უნდა გამოაქვეყნოს.

"განა სხეულის სიშიშვლე არ ხდება კადნიერი და აღვირასხმული ცხოვრების საწინდარი? და მერე მღვდელს რომ არ უხდება ასეთი საქციელი, ვერ აცნობიერებთ?! არ გირჩევთ ასეთ თავგამოდებას. დაფიქრდით რას ამბობთ. ოჯახის ახლობლად თუ თვლით თავს, მათი შეცდომებიც უნდა გაწუხებდეთ", - დაწერა ფოტოების კომენტირებისას "ფეისბუქის" მომხმარებელმა თამილა ნიჟარაძემ.

მოგვიანებით განმარტება ამ ფოტოებზე თავად პეტრე კოლხმა გააკეთა.

"დიახ,

ეს ჩემი შვილია... ძალიან ლამაზი, ნიჭიერი, გონიერი, განათლბული და უკიდურესად ნაკითხი... საოცარ გარემოში და ლაზური სევდით გაჯერებულ მდინარეში გადაღებული ფოტოებით... ყოველთვის მომგებიანია თვითკრიტიკულები იყოთ. როგორ ფიქრობთ, თქვენ იცით რა არის შესაძლებელი და რა შეუძლებელი?! ჩემთვის ყველაზე მეტად შეუძლებელი სხვისი ნაბიჯებით ცხოვრებაა.

ხშირად რკინის საზღვრებს ვადგენთ იმაზე მეტად, ვიდრე ამას ღმერთი ითხოვს ჩვენგან...

უკრძალავთ სხვას იმის გაკეთებას, რაც თავადაც გსურთ გააკეთოთ, მაგრამ საკუთარი, ხელოვნურად შექმნილი დოგმების მსხვერპლი ხდებით...

რეალიზდით, იცხოვრეთ, გაიღიმეთ... რატომ უნდა იყოს ასეთი საინტერესო, ვინ, სად და რა ფორმით ცდილობს გაილამაზოს ცხოვრება... ეძებეთ თქვენი წილი ბედნიერება და მერწმუნეთ, აუცილებლად იპოვით... მიყვარხართ.."- წერს კოლხი.