საქართველოს რუსული ემბარგო ემუქრება - რუსეთი სანქციებს აწესებს

პოლიტიკა - 10:29, 05 Aug, 2015

4094

რუსეთი, ევროპის იმ ქვეყნების მიმართ, რომლებიც რუსეთის წინააღმდეგ დაწესებულ სანქციებს შეუერთდნენ, ემბარგოს დაწესებისთვის ემზადება. ამის შესახებ ინფორმაციას „რია ნოვოსტი“ რუსეთის სოფლის მეურნეობის სამინისტროზე დაყრდნობით ავრცელებს.

გავრცელებული ინფორმაციით, საპასუხო ზომები საქართველოსაც შეეხება.

ჯერჯერობით, უწყება ქვეყნების სრულ ჩამონათვალს არ ავრცელებს.

„ჩვენ ვმუშაობთ ამ საკითხე. თუკი ევროკავშირის არაწევრმა ქვეყნები მართლაც შეუერთდნენ დაწესებულ სანქციებს, უნდა განახორციელდეს საპასუხო სამრეწველო ემბარგოს კორექტირება და შესაბამისი ინიციატივით რუსეთის პრეზიდენტს უნდა წარედგინოს“ - განაცხადა ქვეყნის პრემიერ-მინისტრმა, დიმიტრი მედვედევმა.

რუსეთის სოფლის მეურნეობის სამინისტროში დაადასტურეს, რომ კონტრზომების შემოღების საკითხი საქართველოსთან მიმართებითაც მუშავდება. "ქვეყნების სია ზუსტდება" განაცხადეს სამინისტროში.

შეგახსენებთ, გასული თვის ბოლოს ევროკავშირის ოფიციალურმა ვებგვერდმა ინფორმაცია გაავრცელა, რომ ჩერნოგორიამ, ალბანეთმა, ისლანდიამ, ლიხტენშტეინმა, ნორვეგიამ, უკრაინამ და საქართველომ რუსეთის წინააღმდგეგ ევროკავშირის მიერ დაწესებული სანქციების გახანგრძლივებას მხარი დაუჭირა.