ნინოშვილის მოსახლეობა წყლის მიწოდების მოთხოვნით საპროტესტო აქციას მართავს

პოლიტიკა - 17:56, 04 Aug, 2015

1847

ლანჩხუთის სოფელ ნინოშვილში ამ წუთებში საპროტესტო აქცია მიმდინარეობს.

"გურიის მოამბის" ინფორმაციით, ცენტრში შეკრებილი მოსახლეობა ტენდერში გამარჯვებულ კომპანიას უპირისპირდება, რომელსაც სოფლისთვის წყლის მიწოდების პრობლემა უნდა მოეგვარებინა.

კომპანია "უნივერსალ ჯორჯია 2008"-მ ტენდერში ორი პროექტი მოიგო და მას სოფელ ნინოშვილისა და არჩეულის წყალმომარაგება უნდა უზრუნველეყო.

როგორც აქციის მონაწილეები აცხადებენ, პროექტი არასწორად იყო გაკეთებული, რადგან ორივე სოფლისთვის წყალის მიწოდება ვერ შეძლეს. მათივე თქმით, პირველ ეტაპზე კომპანიამ სოფელ არჩეულში დაასრულა სამუშაოები, სოფელ ნინოშვილისთვის კი წყლის საკმარისი რაოდენობით მიწოდება ვერ შეძლო.

"მოვითხოვთ შეჩერდეს პირველი პროექტი, რადგან ორივე სოფლისთვის წყალი საკმარისი არ არის. პირველ ეტაპზე არჩეულში გაუშვეს წყალი, ჩვენთან კი მთლიანად დაშრა და უწყლოდ დავრჩით. არასწორად დააპროექტეს ჩასატარებელი სამუშაოები და ამ ზაფხულში ჩვენ ჩავვარდით საშინელ დღეში. სასწრაფოდ მოგვიგვარონ პრობლემა, თორემ აქციებს უფრო მასშტაბური ხასიათი მიეცემა"- განაცხადა აქციის ერთ-ეთმა მონაწილემ.

ლანჩხუთის გამგებლის პირველი მოადგილის, ნუგზარ ცინცაძის განცხადებით, ხვალ ამ საკითხთან დაკავშირებით გამგეობაში სპეციალური სხდომა გაიმართება, სადაც იმსჯელებენ, თუ რა შეიძლება გაკეთდეს წყალთან დაკავშირებით ადგილობრივების პრობლემის გადასაჭრელად.