„მერია არაკომპეტენტურია, გასარკვევია სად დახარჯა 94 მილიონამდე თანხა?“

პოლიტიკა - 13:47, 04 Aug, 2015

1584

საკრებულოს ფრაქცია "დემოკრატიული მოძრაობა ერთიანი საქართველოს" წევრი თამარ ცინცაბაძე თბილისის მერიას არაკომპეტენტურობაში ადანაშაულებს. ამის შესახებ ცინცაბაძემ დედაქალაქის ბიუჯეტის შესატანი ცვლილებების განხილვასთან დაკავშირებით განაცხადა. ცინცაბაძეს კითხვები ოლიმპიადისთვის გამოყოფილი თანხების ხარჯვასთან დაკავშირებით აქვს:

"თითქმის ყოველ თვე ხდება ბიუჯეტში ცვლილება, რაც იმის დასტურია, რომ მერია არის ნამდვილად არაკომპეტენტური. სამწუხარო არის ისიც, რომ 29 მილიონიდან დაწყებული, რაც გამოყოფილი იყო ოლიმპიადისათვის, ჩვენ ავედით თითქმის 94 მილიონზე. აუცილებელი არის, საკრებულომ მოისმინოს რამდენად ეფექტურად დაიხარჯა გამოყოფილი თანახა" განაცხადა ცინცაბაძემ.

საკრებულოს დღევანდელ სხდომაზე თბილისის ბიუჯეტში შესატან ცვლილებებზე მსჯელობენ. ცვლილებებს აპროტესტებს ოპოზიცია, რომელიც ოლიმპიური ფესტივალისთვის დამატებით 5 მილიონი ლარის გამოყოფასაც არ ეთანხმება. პროექტის მიხედვით ბიუჯეტი 46 მილიონი ლარით იზრდება. აღნიშნული თანხა ძირითადად 13 ივნისის სტიქიის შედეგად დაზიანებული ინფრასტრუქტურის აღსადგენად არის გათვალისწინებული.