„ნაციონალური მოძრაობა“ საყოველთაო ჯანდაცვაში არსებულ ფინანსურ პრობლემებზე საუბრობენ.

ამის შესახებ პარტიის ერთ-ერთმა ლიდერმა ზურაბ ჭიაბერაშვილმა განაცხადა.

„საყოველთაო ჯანდაცვის პროგრამის 9 თვის (3 კვარტალი) ხარჯი 360 მლნ ლარი უნდა ყოფილიყო. დავით სერგეენკომ ამ პროგრამის ბიუჯეტი ისე დაგეგმა, რომ თვეში საშუალოდ 40 მლნ ლარზე მეტი არ უნდა დახარჯულიყო, ანუ დღეში საშუალოდ 1,3 მლნ.

ბამისად, პროგრამა დეფიციტურია.

გასულ კვირაში მთავრობამ საყოველთაო ჯანდაცვის პროგრამის 9 თვის ბიუჯეტი 361 მლნ ლარიდან 404 მლნ ლარამდე გაზარდა, ანუ ის 43 მლნ ლარი დაამატა, რომლის დეფიციტი უკვე განვლილი 7 თვის განმავლობაში წარმოიშვა.

ეს კი ნიშნავს, რომ წლის ბოლომდე საყოველთაო ჯანდაცვის პროგრამას კიდევ მინიმუმ 35 მლნ ლარი უნდა დაამატონ სხვა წყაროებიდან, სულ ჯამურად კი, დამატებული თანხის ოდენობა დაახლოებით 80 მლნ ლარი გამოვა.

ეს არ ნიშნავს, რომ თუნდაც დეფიციტური ხარჯვით ჯანდაცვის სამინისტრომ კლინიკების დავალიანება სრულად დაფარა. არა! დავალიანება რჩება და ეს მედპერსონალის ხელფასების გაუცემლობაში, სამედიცინო მომსახურების ხარისხის დაქვეითებასა და პაციენტების მიერ ჯიბიდან გადახდების ზრდაში აისახება.

ისედაც, ჯანდაცვის საერთო დანახარჯებში საყოველთაო ჯანდაცვის პროგრამის წილი მხოლოდ 25%-ია (არადა ბევრს ჰგონია, რომ საავადმყოფოში შესულ პაციენტს ყველაფერს სახელმწიფო უფინანსებს). ზემოაღნიშნული პრობელემები კი ისევ პაციენტების და მათი ოჯახების ჯიბეებს აწვება“, - განაცხადა ჭიაბერაშვილმა.