"რია ნოვოსტი" - "აბაშიძე საქართველოს გეგმებზე NATO-ში: რა საჭიროა ილუზიები, ჩვენ არავინ გვიცავს"

პოლიტიკა - 15:04, 02 Aug, 2015

4033

"აბაშიძე საქართველოს გეგმებზე NATO-ში - რა საჭიროა ილუზიები, ჩვენ არავინ გვიცავს" - ამ სათაურით ეხმაურება "რია ნოვოსტი" The Wall Street Journal-ში გამოქვეყნებულ სტატიას, რომელიც საქართველო-რუსეთის ურთიერთობების დათბობას ეხება.
რუსული საინფორმაციო სააგენტოს სტატიაში ნათქვამია, რომ საქართველოს პრემიერის სპეციალურმა წარმომადგენელმა რუსეთთან ურთიერთობაში The Wall Street Journal-ს განუცხადა, რომ საქართველო ცდილობს დაალაგოს ურთიერთობები ჩრდილოელ მეზობელთან.

რუსული სააგენტო წერს, რომ ეკონომიკურმა პრობლემებმა და უსაფრთხოების საკითხებმა საქართველო აიძულა კვლავ რუსეთისკენ შეტრიალებულიყო. წლების განმავლობაში საქართველოს პროდასავლური კურსი ჰქონდა, რამაც რუსეთთან ურთიერთობის გაციება, ხოლო 2008 წლის მერე ურთიერთობის სრული გაწყვეტა მოჰყვა. ახლა კი საქართველოს მთავრობა ცდილობს გარკვეული ბალანსი იპოვოს მეზობელტან ურთიერთობაში. ამასთან "ნატოში" გაწევრიანება გრძელვადიან გეგმებში რჩება, მაგრამ აბაშიძის აზრით, აქამდე საქართველო "ისე არ უნდა მივიდეს, რომ საკუთარი ქვეყნისგან ქვა ქვაზე არ დატოვოს".
"საქართველოს სპეცწარმომადგენელი თვლის, რომ ქვეყნის მოსახლეობა არ უნდა იქნას შეყვანილი შეცდომაში - "რა საჭიროა ილუზიები, ჩვენ არავინ გვიცავს, რაც სრულად ასახავს ამ პრობლემური რეგიონის რეალობას", - თვლის ზურაბ აბაშიძე," - წერს "რია ნოვოსტი".

დასასრულს, რუსული სააგენტო ხაზს უსვამს იმ ფაქტს, რომ 2012 წელს საქართველოში მოსულმა ხელისუფლებამ საგარეო პოლიტიკის პრიორიტეტად რუსეთთან ურთიერთობის ნორმალიზება დაისახა.