უმრავლესობის წევრი ვახტანგ ხმალაძე მინისტრთა კაბინეტში განხორციელებულ ცვლილებებს მიესალმება.

როგორც ხმალაძემ „ნიუპოსტს“ განუცხადა, გიორგი მღებრიშვილის და კახი კახიშვილისგან დადებითი მოლოდინები აქვს.

„ბატონ მღებრიშვილს თავის დროზე პარლამენტმა ნდობა გამოუცხადა. მინდა გითხრათ, რომ ამ თანამდებობაზე მისი ყოფნისას მნიშვნელოვანი თვისობრივი ცვლილებები განხირციელდა. მის მუშაობას დადებითად ვაფასებ. გარკვეული ხარვეზები არის, მაგრამ ეს სისტემა ისეთ მდგომარეობაში იყო, რომ იდეალური მდგომარეობის მიღწევას დიდი დრო დასჭირდება. ჩემი აზრით, მან საკმარისად კარგად შეასრულა თავისი მოვალეობა, რაც აჩენს იმის იმედს, რომ ახალ თანამდებობაზე შესაბამის შედეგებს მიაღწევს. იგივე შემიძლია ვთქვა კახი კახიშვილზე. მთელი რეფორმების პროცესში, რაც სასჯელაღსრულების სამინისტროში განხორციელდა, მისი როლი მნიშვნელოვანი იყო. აქედან გამომდინარე, ვფიქრობ გააგრძელებს კურსს და ბოლომდე მიიყვანს დაწყებულ რეფორმებს“, - ამბობს ხმალაძე.

რაც შეეხება გავრცელებულ ინფორმაციას იმის შესახებ, რომ პრემიერს შს მინისტრის პოსტზე „რესპუბლიკელებმა“ გიგლა აგულაშვილის კანდიდატურა შესთავაზეს ხმალაძე უარყოფს.

„სრული პასუხისმგებლობით ვამბობ, რომ „რესპუბლიკელებს“ ეს საკითხი არ დაუსვავთ და არ შეუთავაზებიათ გიგლა აგულაშვილის კანდიდატურა“, - ამბობს ხმალაძე.