პრეზიდენტი კეზერაშვილის საქმეზე - ,,საზოგადოების მოლოდინი არ არის დაკმაყოფილებული“

პოლიტიკა - 22:37, 31 Jul, 2015

3350

პრეზიდენტი ინტერპოლის ძებნილთა სიკიდან დავით კეზერაშვილის ამოღებას ეხმაურება. როგორც გიორგი მარგველაშვილმა ტელეკომპანია „მაესტროს“ ეთერში განაცხადა,

მისი თქმით, სერიოზული პრობლემაა ის, რომ პროკურატურის მრავალჯერ მიმართვის მიუხედავად ექსმაღალჩინოსნების გადმოცემაზე სხვადასხვა ქვეყნები უარს ამბობენ.

"წითელი ცირკულარიდან მოხსნის ეს საქმე არ არის პირველი. მე, ისევე როგორც ამ საზოგადოების ძალიან დიდი ნაწილი, რომელსაც სერიოზული კითხვის ნიშნები გვქონდა იმ დარღვევებთან, რომლებსაც ზოგიერთი ღიად ვაკრიტიკებდით წინა ხელისუფლების დროს, ველით, რომ ამ გახმაურებული საქმეების ადრესატები ქართული სასამართლოს წინაშე წარდგებიან. მე ამას ველი დიდი ხანია. რასაც მე ვხედავ, ეს არის ის ვითარება, რომ საერთაშორისო არენაზე, როდესაც კონკრეტულ ქვეყნებს მიმართავენ ჩვენი პატივცემული პროკურორები მათ მიერ შედგენილი საქმეებით, ჩვენ ძირითადში ჯერჯერობით ვერ ვიღებთ ამ შესაძლებლობას. საქართველოსთვის ამ ადამიანების გადმოცემა არ ხორციელდება. მე მიმაჩნია, რომ ეს სერიოზული პრობლემაა. საზოგადოების მოლოდინი, რომ იქნებოდა პროფესიული და კვალიფიციური გამოძიება, რომელიც გაუძლებდა არამარტო ქართულ სასამართლოს, არამედ საერთაშორისო სტანდარტებს, ჯერჯერობით არ არის დაკმაყოფილებული", - განაცხადა გიორგი მარგველაშვილმა.