,,გულისამრევია თქვენი მინისტრობაცა და თქვენი ქცევაც“

პოლიტიკა - 13:34, 31 Jul, 2015

3708

იმერეთში დაღუპული ჯარისკაცების დედებთან თავდაცვის მინისტრის თინა ხიდაშელის შეხვედრას სოციალურ ქსელში ეხმაურება ,,ნაციონალური მოძრაობის“ წევრი გივი თარგამაძე და მინისტრს ქცევას და ქმედებას უკრიტიკებს.

,,თავდაცვის მინისტრი, რომელიც რუსეთთან ომში დაღუპული გმირების დედებს ეძველბიჭება, მომიტევეთ და ებლატავება - ამაზე მეტი საზიზღრობის წარმოდგენა შეიძლება? აქ ქუჩაში მუდმივი დგომით მოვხვდიო - ეგ მართალია - იდექით, მათ გვერდით იდექით, ვინც ამ დედების შვილების მკვლელობას აპრავებდა. ამჟამად კი თანაპარტიელი კოლეგა მინისტრი აპრავებს. გულისამრევია თქვენი მინისტრობაცა და თქვენი ქცევაც“ - წერს გივი თარგამაძე.

შეგახსნებთ, რომ თავდაცვის მინისტრი, სამხედრო კვირეულის ფარგლებში დღეს დილიდან ხონის, კოპოტნარის და ქუთაისის მესამე ქვეითი სამხედრო ბაზას ეწვია. "მე ვერ შეგპირდებით, რომ ახლავე კომპენსაცია დაგენიშნებათ. ეს არ არის ჩემი პრეროგატივა. ამისთვის საჭიროა კანონში ცვლილების განხორციელება. მე კანონს ვერ დავარღვევ. ასევე, ძალიან გთხოვთ ნუ გვეტყვით იმას, რომ თქვენი დაღუპული შვილების "წყალობით" ვართ ჩვენ. მართალია, აგვისტოს ომში არ დავღუპულვარ, მაგრამ მთელი ჩემი შეგნებული ცხოვრება ქუჩაში ვიდექი და ამის გამო მოვხვდი აქ", - ასეთი პასუხი გასცა შეხვედრაზე დაღუპული ჯარისკაცების დედებს თავდაცვის მინისტრმა, თინათინ ხიდაშელმა.

ეს "განმარტება" ხიდაშელმა მას შემდეგ გააკეთა, რაც ერთი-ერთი დაღუპული ჯარისკაცის დედამ ადგილობრივი ხელისუფლება და მთავრობა უყურადღებობაში დაანაშაულა და აღნიშნა, რომ ისინი თანამდებობზე მათი დაღუპული შვილების წყალობით მოხვდნენ.

"მოდის აგვისტო და არავინ გვეკითხება გვშია, გვწყურია, ვარსებოთ თუ რას ვშვებით. ყურადღებას არავინ გვაქცევს, როცა ჩვენი ბიჭები ქვეყანას შევწირეთ", - განაცხადეს მინისტრთან შეხვედრის დროს.

დაღუპული ჯარისკაცების დედების საყვედურები მინისტრმა არ გაიზიარა და განუმარტა, რომ მათთან კომუნიკაცია მთავრობას არასოდეს გაუწყვეტია.

"ზუსტად იმისთვის, რომ თქვენ მოგისმინოთ და მოგიკითხოთ არა მხოლოდ აგვისტოში, არამედ სისტემატიურად, ადამიანი დავნიშნე სამინისტროში, რომელიც ამ ყველაფერს უხელმძღვანელებს, მაგრამ თქვენ თუ არ ისაუბრებთ მათთან პრობლემებზე, ჩვენ ეს არ დაგვესიზმრება", - აღნიშნა ხიდაშელმა.