აჭარის 6-კაციან ,,უსკოს“, რომელიც უპარტიო უნდა იყოს, კოალიციის პარტიები აკომპლექტებენ

პოლიტიკა - 13:15, 31 Jul, 2015

2044

აჭარის ავტონომიური რესპუბლიკის უმაღლეს საარჩევნო კომისიაში სამი ვაკანტური თანამდებობის დასაკავებლად კონკურსი გამოცხადდა. ამასთან დაკავშირებით აჭარის მთავრობის აპარატში შეიქმნა საკონკურსო კომისია, რომლის შემადგენლობაც დღემდე არ არის ცნობილი. კომისიაში შესული 24 კანდიდატიდან კომისიამ მთავრობის თავმჯდომარეს წარუდგინა 9 კანდიდატი, ხოლო თავმჯდომარემ აჭარის ავტონომიური რესპუბლიკის უმაღლეს საბჭოს წარუდგინა 6 კანდიდატი. წარდგენილი კანდიდატები არ უნდა იყვნენ რომელიმე პარტიის წევრი, ხოლო ,,ნიუპოსტის“ ინფორმაციით, აღნიშნულ შემთხვევაში წარდგენილი კანდიდატების უმრავლესობა არიან მმართველ კოალიციაში შემავალი პარტიის წევრები და უკვე ცნობილია თუ ვინ გაიმარჯვებს და დაიკავებს ვაკანტურ ადგილებს.

ცენტრალური საარჩევნო კომისიის ყოფილი თავმჯდომარე, "სამოქალაქო ალიანსი საქართველოსთვის" ლიდერი ზურაბ ხარატიშვილი ,,ნიუპოსტთან“ ამბობს, რომ აჭარის უმაღლესი საარჩევნო კომისია (უსკო) უპარტიო იყო და ეს იყო წინგადადგმული ნაბიჯი. მისივე თქმით, დღეს 6-კაციან უსკოს მთლიანად კოალიციის პარტიები აკომპლექტებენ.

,,როგორც ცნობილია აჭარის რესპუბლიკის 21 კაციან უმაღლეს საბჭოში “ქართული ოცნება” წარმოდგენილია 9 დეპუტატით, ეს კი არ არის საკმარისი კენჭისყრაში მოიპოვონ უმრავლესობა და ამიტომ მათ სჭირდებათ ორი ხმა სასურველი კანდიდატურების გასაყვანად. ამ ორი ხმის დამატება მათთვის შეუძლიათ ან “ნაციონალებს” (რვა დეპუტატი) ან “თავისუფალ დემოკრატებს” (სამი დეპუტატი). “ოცნების” გადასარჩენად სასწრაფოდ “დაიძრა” “თავისუფალი დემოკრატების” ფრაქცია და კოალიცია კვლავ “ სრული შემადგენლობით” შედგა. შეგახსენებთ, რომ აჭარის უმაღლესი საარჩევნო კომისია (უსკო) უპარტიო იყო და ეს იყო წინგადადგმული ნაბიჯი. საარჩევნო სისტემის “პოლიტიზაცია” სწრაფი ტემპით მიმდინარეობს და სავარაუდოდ მალე უსკოც “ კოალიციური” იქნება. კერძოდ, უსკოში უკვე არჩეულია გუგული დუაძე (რესპუბლიკური პარტია), ახალი სამეულიდან აირჩევენ ირაკლი გვარამიას (კონსერვატიულიპარტია), გოლომანიძე რამაზის (ეროვნული ფორუმი). მჟავანაძე თორნიკეს ( თავისუფალი დემოკრატები).

მომავალი წლის მარტ-აპრილში წარმოქმნილ ორ ვაკანტურ თანამდებობას შესაბამისად “ქართული ოცნება” (თავმჯდომარე) და “მრეწველები” დაიკავებენ და მომავალი არჩევნებისათვის აჭარაში ექვსკაციან უსკოს მთლიანად “კოალიციური” პარტიები შეავსებენ, ეს ნიშნავს, რომ აპრილში აჭარაში “კოალიცია” პირვანდელი სახით “აღდგება” - აცხადებს ზურაბ ხარატიშვილი.