სასჯელაღსრულების მინისტრი გიორგი მღებრიშვილ ე.წ. კორტების სპეცოპერაციის საქმის მოსამართლის მოწოდებას ეხმაურება და ამბობს, რომ პატიმრების უფლებების დაცვასთა დაკავშირებით მას არავის „შემოძახილი არ სჭირდება“.

ამის შესახებ გიორგი მღებრიშვილმა მთავრობის სხდომის დასრულების შემდეგ განაცხადა.

"არავის შემოძახილი არ მჭირდება. მე იქ იმისთვის ვარ, რომ დავიცვა მათი უფლებები. არავის შენიშვნა მე ნამდვილად არ მჭირდება. თუ ვინმე იცავს მათ უფლებებს, პირველ რიგში ეს ვარ მე", - განაცხადა გიორგი მღებრიშვილმა.

ე.წ. კორტების საქმის მოსამართლე ბადრი კოჭლამაზაშვილი მოუწოდებს სასჯელაღსრულების სამინისტროს, რომ უზრუნველყოს პატიმრის უსაფრთხოება და სათანადო პირობები.

ეს განცხადება კოჭლამაზაშვილმა ირაკლი ფირცხალავას და საქმეზე ბრალდებული სხვა პირების განცხადების შემდეგ გააკეთა.

ირაკლი ფირცხალავამ პროცესზე გლდანის ციხიდან ე.წ მარტოსოვის ციხეში დაბრუნება მოითხოვა. მისი თქმით, #8-ე დაწესებულებაში მას პატიმრები შეურაცხყოფას აყენებენ. როგორც ბრალდებულმა განაცხადა, თუ მას ე.წ. მატროსოვის ციხეში არ გადაიყვანენ, ორშაბათიდან სასამართლო სხდომებს აღარ დაესწრება და ადვოკატზეც უარს იტყვის.