ე.წ. კორტების სპეცოპერაციის საქმეზე ბრალდებული ირაკლი ფირცხალავას გლდაის ციხეში გადაყვანას სოციალურ ქსელში ეხმაურება „ნაციონალური მოძრაობის“ წევრი გივი თარგამაძე.

„SOS გუშინ პროცესზე ირაკლი ფირცხალავამ ამხილა პროკურატურა რიგითი სპეცრაზმელების გადაბირებაში საკნებიდან გაყვანისა და მათზე ზეწოლის გზით. გუშინვე ის მატროსოვიდან გადაიყვანეს გლდანის მერვე სასჯელაღსრულების დაწესებულებაში, სადაც მთელი ღამის განმავლობაში ჰყავდათ გამოკეტილი მწერებითა და ვირთხებით სავსე სარდაფში. დილიდან გადაიყვანეს საკანში და მთელი დღეა, ამ წუთწბშიც, დაწესებულების ადმინისტრაციის დავალებით კრიმინალები ახორციელებენ მასზე განუწყვეტელ ზეწოლას გინები, მუქარით და გაუსაძლისი ხმაურის შექმნით. ისევე, როგორც გიგი უგულავას შემთხვევაში, ხდება ამ პროცესის გადაღება და მიწოდება ივანიშვილისთვის, რათა მან ისიამოვნოს ამ ძალადობით. შეგახსენებთ, ივანიშვილმა თავად ღიად მოუხსენია ირაკლი ფირცხალავა, როგორც მისთვის საშიში ერთერთი მთავარი ფიგურა. კრიმინალს რომ შურს აძიებინებთ მათ დამარცხებაში დამსახურებულ პოლიციელზე, მაგიტომაცაა, ორი კვირის განმავლობაში შს მინისტრი ვერ დაგინიშნავთ. ცეცხლს ეთამაშებით. პოლიციელთა მოთმინების ფიალა სავსეა. ახლავე შეწყვიტეთ უმსგავსობა, თორემ თქვენთვის საზარელ შედეგს მიიღებთ. მეგობრებო, ნუ დარჩებით გულგრილნი! ერთად დავიცვათ პოლიციელი! ყველამ დაწერეთ ამ უმსგავსობაზე თქვენს კედელზე", - წერს თარგამაძე.