„საერთაშორისო გამჭვირვალობა - საქართველოს“ აღმასრულებელი დირექტორი ეკა გიგაური პრეზიდენტის მიერ ეროვნული ბანკის შესახებ კანონპროექტზე ვეტოს დადებას მიზანშეწონილად მიიჩნევს.

გიგაურის თქმით, აღნიშნული კანონპროექტი საკონსტიტუციო სასამართლოში უნდა გასაჩივრდეს.

„ვფიქრობ, რა თქმა უნდა, მიზანშეწონილი იქნება, თუკი პრეზიდენტი განიხილავს ვეტო-ს დადების უფლებას და ეს იქნება მიზანშეწონილი იმ უბრალო მიზეზის გამო, რომ საბანკო ზედამხედველობის სამსახური და ზოგადად, საბანკო სექტორი უნდა იყოს დამოუკიდებელი. ამ კანონით ეს დამოუკიდებლობა არ არის უზრუნველყოფილი. შესაბამისად, საფრთხის ქვეშ დგება ზოგადად საბანკო სექტორის განვითარება. ასევე, მგონია, რომ ყველაფერთან ერთად ეს კანონპროექტი ეწინააღმდეგება საქართველოს კონსტიტუციას. ვფიქრობ, კარგი იქნება, თუკი განიხილება საკონსტიტუციო სასამართლოში სარჩელის შეტანის საკითხი“, - განაცხადა ეკა გიგაურმა.