თინათინ ხიდაშელი გურჯაანში სადაზვერვო ქვედანაყოფების სწავლებას დაესწრო

პოლიტიკა - 12:10, 26 Jul, 2015

1041

გურჯაანის რაიონის სოფელ ჯიმითში სადაზვერვო ქვედანაყოფების სიტუაციური საველე სწავლება "სამგლე ველის" მიმდინარეობს, რომელიც 22 ივლისს დაიწყო და 31 ივლისს დასრულდება. დღეს სწავლების პროცესს თავდაცვის მინისტრი თინათინ ხიდაშელი დაესწრო.
თავდაცვის სამინისტროს მიერ გავრცელებული ინფორმაციის თანახმად, თავდაცვის მინისტრმა, გენერალური შტაბის უფროსის მოადგილე, პოლკოვნიკ რომან ჯოხაძესთან ერთად საველე ბანაკის მართვის ცენტრი დაათვალიერა და სწავლების შესახებ დეტალური ინფორმაცია მიიღო. მინისტრმა სხვადასხვა სასწავლო წერტილი და საპატრულო ბანაკი მოინახულა.
"ჯარი მუდმივად მზადების პროცესშია და ეს სწავლებაც ამის დასტურია. ჩვენი ჯარისკაცები მომზადების კურსს, პრაქტიკულად, 12 თვის განმავლობაში, ყოველდღიურ რეჟიმში, სხვადასხვა ბაზებზე და სხვადასხვა ადგილებში გადიან. ამ შემთხვევაში სადაზვერვო კურსს ვესწრებით და ვფიქრობ, რომ ძალიან მნიშვნელოვანია ეს პროცესი იყოს მუდმივად განახლებადი - მოიზიდოს რესურსები როგორც უცხოელი ინსტრუქტორების მეშვეობით, ასევე იმ მატერიალური საშუალებებით, რომლითაც მარაგდება და მდიდრდება ჯარი", - აღნიშნა თინათინ ხიდაშელმა.