"სამართალდამცავთა დაცვის ლიგის" აღმასრულებელი დირექტორი ლევან გვაზავა გუშინ ე.წ. კორტების სპეცოპერაციის საქმეზე დაკითხული სპეცრაზმელების ჩვენებებს ეხმიანება და აცხადებს, რომ მისთვის ძალიან მძიმე სანახავი და მოსასმენი იყო „ღირსება აყრილი“ სპეცრაზმელების იდენტური დაზეპირებული ჩვენებების მოსმენა.

ამის შესახებ ლევან გვაზავა საკუთარ ფეისბუქ გვერდზე წერს.

"გუშინდელი სასამართლო პროცესი იყო უმძიმესი,საშინელი სანახავი იყო ღირსებააყრილი სპეცრაზმის თანამშრომლები,რომლებიც პროკურატურის მიერ დაწერილ ტყუილებს,ზეპირად იმეორებდნენ. 25 წელია ამ სისტემაში ვმუშაობ და მე,სახელმწიფოს მიერ ასეთი თავხედური ზეწოლა არ მინახია!გუშინ პროცესზე პროკურორების თვალებში,იკითხებოდა,კრიმინალების რევანშისტური აშკარა ნიშნები!ებრძვიან იმ ადამიანებს ვინც კრიმინალი დაამარცხა ამ ქვეყანაში. მაგრამ მინდა ყველამ იცოდეს,რომ სიმართლე მაინც გაიმარჯვებს. პოლიცია ყოველთვის უზენაისი იქნება ჩვენი ქვეყნისთვის,ვიდრე კრიმინალური სამყარო. ჩვენ ამ ბრძოლას ბოლომდე მივიყვანთ გამარჯვებამდე. ძალიან მალე აუცილებლად გამოვააშკარავებთ იმ სახელმწიფო მოხელეებს,ვინც არიან კრიმინალური სამყაროს ლიდერებთან გარიგებაში“, - წერს გვაზავა.

ე.წ. კორტების სპეცოპერაციის საქმეზე ბრალდებულმა რიგითი სპეცრაზმელის ინფორმაციით, ირაკლი ფირცხალავა და კახა ნაკანი მას ცრუ ჩვენების მიცემას სთხოვდნენ.

იასონ მელაძემ ხელმძღვანელების საწინააღმდეგო ჩვენება დღევანდელ პროცესზე მისცა.

მან დეტალურად გაიხსენა სპეცოპერაციის დღეს და აღნიშნა, რომ ცეცხლის გაცემის ბრძანება ფირცხალავამ გასცა. მოწმე ალექსანდრე სანიკიძემ კი განაცხადა, რომ მას ფირცხალავას ბრძანება არ შეუსრულებია და ცეცხლი მხოლოდ იმიტომ გახსნა, რომ ნაკანმა გაისროლა.

ე.წ. კორტების სპეცოპერაციის საქმეზე პოლიციის ყოფილი მაღალჩინოსნების საქმე ერთად განიხილება, დანარჩენი 7 რიგითი სპეცრაზმელის საქმე კი - ცალკე.