ნაცმოძრაობა სოციალურად დაუცველი ოჯახებისათვის საარსებო შემწეობის აღდგენას ითხოვს

პოლიტიკა - 11:48, 25 Jul, 2015

836

ნაციონალური მოძრაობა სოციალურად დაუცველი ოჯახებისათვის საარსებო შემწეობის აღდგენას ითხოვს - ამის შესახებ დღეს პარტიის ოფისში გამართულ პრესკონფერენციაზე ზურაბ ჭიაბერაშვილმა განაცხადა.

,,მილიარდერი ივანიშვილის მთავრობა ყოველთვიურად ათასობით სოციალურად დაუცველ ოჯახს ართმევს საარსებო შემწეობას იმ ფონზე, როდესაც ამავე მთავრობის არასწორი ეკონომიკური პოლიტიკით ხალხი უფრო და უფრო ღარიბდება.

დავით სერგეენკოს მიერ 2014 წლის დეკემბერში შემოღებულმა სოციალურად დაუცველი მოსახლეობის აღწერის ახალმა მეთოდოლოგიამ ბოლო 7 თვის განმავლობაში 40,000 ადამიანი დატოვა შემწეობის გარეშე. მათგან 11,000 პენსიონერია, უმეტესად მარტოხელა მოხუცები.

ამით მთავრობა თვეში 2 მლნ ლარით ნაკლებს ხარჯავს გაჭირვებულ ადამიანებზე მაშინ, როდესაც თვეში 30 მლნ ლარით არის გაზრდილი ბიუროკრატიის ხელფასის, პრემიებისა და დანამატების ოდენობა.

ათი ათასობით ადამინისთვის საარსებო შემწეობის მოხსნის ფონზე ცინიკურად გამოიყურება პრემიერ ღარიბაშვილის განცხადება, რომ სოციალურად დაუცველ ოჯახებს დენის ტარიფის ნამატს სახელმწიფო დაუფარავს.

რა ქნან იმ ადამიანებმა ვინც, სერგეენკოს მიერ შემოღებული არსწორი მეთოდოლოგიის გამო მაღალი ქულები მოუვიდათ და საარსებო შემწეობის გარეშე დარჩენენ?“ - აცხადებს ჭიაბერაშვილი.

საპარლამენტო ოპოზიცია პრემიერ-მინისტრისგან, სოციალურად დაუცველი ოჯახებისთვის საარსებო შემწეობის აღდგენის მიზნით, მთავრობის საგანგებო სხდომის მოწვევას ითხოვს.

,,ერთიანი ნაციონალური მოძრაობა რამდენიმე დღეს აძლევს პრემიერ ღარიბაშვილს, მოიწვიოს მთავრობის საგანგებო სხდომა და მიიღოს სპეციალური გადაწყვეტილება სოციალურად დაუცველთა ბაზიდან ამოყრილი ოჯახებისათვის საარსებო შემწეობის აღდგენის შესახებ“ - განაცხადა ზირაბ ჭიაბერაშვილმა.