„კახეთის საინფორმაციო ცენტრის“ ხელმძღვანელის გელა მთივლიშვილის ინფორმაციით, რეგიონის გუბერნატორმა რამდენჯერმე მისი მოსყიდვა სცადა.

ამის შესახებ მთივლიშვილი სოციალურ ქსელში წერს.

„კახეთის გუბერნატორმა რამდენჯერმე სცადა ჩემი მოსყიდვა, იგივე მოქრთამვა. ყველა წინადადებაზე უარი მიიღო. ამის შემდეგ პრემიერის სახელით სცადა მოსყიდვა – მეტი "მიმზიდველობისთვის" ალბათ. ისევ უარი მიიღო, არ ვიყიდებით მეთქი. არ ვიცი იყო თუ არა ეს ღარიბაშვილთან შეთანხმებული, თუ მისი სახელის გამოყენებით მანიპულირებდა. არ დავინტერესებულვარ ამის გარკვევით.

დღეს ისევ მოგვაყენა შეურაცხყოფა, თქვა, რომ იბიექტურად არ ვმუშაობთ და ვმაიმუნობთ. თუ მოსყიდვას შეძლებდა, მაშინ არ "ვიმაიმუნებდით".

არ აკეთებს კომენტარს საინფორმაციო ცენტრების ქსელის ჟურნალისტებთან, არადა სხვა საინფორმაციო საშუალებებთან კეკლუცობს.

ეს იმდენს იზამს, რომ სასამართლოში ხომ შემაქვს სარჩელი მის მიერ გავრცელებული არსებითად მცდარი და შეურაცხმყოფელი ინფორმაციის საჯაროდ უარყოფის მოთხოვნით, კიდევ სხვა რამეს გამომტყუებს!“, - წერს მთივლიშვილი.