თინა ხიდაშელი: ეს კიევის პოზიციაა, თუ არცთუ მთლად ნორმალური ფსიქიკის მქონე გუბერნატორის?

პოლიტიკა - 21:04, 23 Jul, 2015

2664

თავდაცვის მინისტრის, თინა ხიდაშელის ხელმძღვანელობით ჩეხეთის რესპუბლიკაში სამუშაო ვიზიტით იმყოფება საქართველოს თავდაცვის სამინისტროსა და გენერალური შტაბის დელეგაცია, რომელსაც ჩეხეთის საკანონმდებლო და აღმასრულებელი ხელისუფლების გარდა, შეხვედრები ჰქონდა ასევე სამხედრო-სამრეწველო კომპლექსის წარმომადგენლებთან. ვიზიტის დროს თინა ხიდაშელი ეწვია ,,რადიო თავისუფლების“ სათავო ოფისს და ვრცელი ინტერვიუ მისცა საკვირაო პროგრამა „დაბრკოლების ზოლის“ ავტორს, კობა ლიკლიკაძეს.

თინა ხიდაშელმა უკრაინის ხელისუფლების მისამართით კითხვა დასვა, მას აინტერსევს ოდესის გუბერნატორის მიხეილ სააკაშვილის მიერ გამოთქმული კრიტიკული პოზიცია საქართველოს ხელისუფლების მიმართ არის მხოლოდ მისი თუ ოფიციალური კიევის პოზიციაც.

,,მე არ ვიცი რა იყო პეტრო პოროშენკოს ამოცანა სააკაშვილის გუბერნატორად დანიშვნის დროს. ეს მათი სუვერენული გადაწყვეტილებაა. შეუძლიათ დანიშნონ რეგიონის გუბერნატორად ვინც სურთ - გიჟი და ნორმალური. ეს არ არის ჩემი გადასაწყვეტი და ჩემი ამოცანა. მე ვიზიარებ მწუხარებას იმ ფაქტების გამო რომელსაც ადგილი ექნება იქ, სააკაშვილის ქმედებებიდან გამომდინარე. მაგრამ ეს მათი გადაწყვეტილებაა. მთავარი სხვა რამეა, რაც მე მაწუხებს არა მხოლოდ როგორც მინისტრს, მაგრამ როგორც ხელისუფლების წარმომადგენელს. მე მაქვს ძალიან სერიოზული კითხვა უკრაინის საგარეო საქმეთა სამინისტროსთან, უკრაინის პრეზიდენტთან, პრემიეთან და ხელისუფელბასთან. როცა მიხეილ სააკაშვილი აკეთებს განცხადებებს უკრაინული მედიისთვის, ქართული მედიისთვის, ბიბისისთვის... მან გააკეთა ძალიან კონკრეტული განცხადებები საქართველო ხელისუფლებასთან დაკავშირებით. როდესაც ის ამ ტიპის განცხადებებს აკეთებს მე როგორც საქართველოს ხელისუფლებას მაქვს კითხვა ჩემი მეგობარი, პერტნიორი ქვეყნის ხელისუფლებასთან - ეს არის მათი სახელმწიფოებრივი პოზიცია თუ ეს არის არც მთლად ნორმალური ფსიქიკის მქონე გუბერნატორის პოზიცია? ამ კითხვაზე პასუხი გულწრფელად მაინტერესებს. მე ვფიქრობ საგარეო საქმეთა სამინისტრო მიიღებს ამაზე პასუხს. ხელისუფლების წარმომადგენელი თავის თავს უფლებას აძლევს ასე მოიხსენიოს პერტნიორი ქვეყნის ხელისუფლება“ - განაცხადა თინა ხიდაშელმა.