ტარიფის შესაძლო ზრდა ხელისუფლების უნიათო პოლიტიკის შედეგია- მელიქიშვილი

პოლიტიკა - 12:10, 23 Jul, 2015

1385

ენერგოკომპანიების მიერ ტარიფის შესაძლო გაზრდას ოპოზიციის წევრები გამოეხმაურენ. „ნაციონალური მოძრაობის“ წევრი ზურაბ მელიქიშვილი მიიჩნევს, რომ ელექტროენერგიაზე ტარიფის შესაძლო მატება ხელისუფლების უნიათო პოლიტიკის შედეგია. მისივე განცხადებით, ხელისუფლებამ არ გაითვალისწინა ოპოზიციის მოწოდება, რომელიც ენერგო სფეროში ინვესტიციების განხორციელებას ითვალისწინებდა და ამან მძიმე შედეგი მოიტანა.

„ბოლო სამი წლის მანძილზე არაერთხელ მოვუწოდეთ ხელისუფლებას, რომ განეხორციელებინათ ინვესტიციები. ამ ხნის განმავლობაში არც ერთი ახალი ინვესტიცია ამ მიმართულებით არ განხორციელებულა. ბუნებრივია, ეს გამოიწვევდა იმ მდგომარეობას, რაშიც დღეს არის ენერგოსისტემა მთლიანად. ამას ემატება უნიათო პოლიტიკის შედეგად გაუფასურებული ლარი, რამაც ასევე ენერგოკომპანიები მძიმე მდგომარეობაში ჩააყენა და საბოლო ჯამში, ნაცვლად განახევრებული ტარიფებისა, მოსახლეობა ღებულობს გაძვირებულ ტარიფებს. ეს მძიმედ აწვება მოსახლეობას, ეკონომიკას და მთლიანად ქვეყანას. ეს არის იმ პოლიტიკის შედეგი, რომელსაც ბოლო სამი წლის განმავლობაში თვალს ვადევნებთ",-განაცხადა ზურაბ მელიქიშვილმა.