სუს-ი არ არის უშიშროების სამინისტროს პრაქტიკის გაგრძელება

სუს-ი არ არის უშიშროების სამინისტროს პრაქტიკის გაგრძელება - გომელაური

პოლიტიკა - 12:39, 22 Jul, 2015

2469

სახელმწიფო უსაფრთხოების სამსახურის ხელმძღვანელის პოსტზე წარდგენილი ვახტანგ გომელაურის თქმით, აღნიშნული სამსახური უშიშროების სამინისტროს პრაქტიკის გაგრძელება არაა. აღნიშნული განცხადება გომელაურმა ადამიანის უფლებათა დაცვისა და სამოქალაქო ინტეგრაციის და თავდაცვისა და უშიშროების კომიტეტების გაერთიანებულ სხდომაზე გააკეთა. გომელაურმა ის ფაქტორები ჩამოთვალა რაც სუს-ს უშიშროების სამინისტროსგან განასხვავებს:

„სხვაობას წარმოადგენს საქართველოს მთავრობისგან დამოუკიდებლობის მაღალი ხარისხი, პოლიტიკური ზეგავლენისგან დაცული სამსახურის ხელმძღვანელი და გარე კონტროლის ქმედითი მექანიზმების ჩამოყალიბება. სახელმწიფო უსაფრთხოების სამსახურის საქმიანობა განხორციელდება იმგვარად, რომ თანაბრად იყოს დაცული, როგორც ქვეყნის უსაფრთხოება, ასევე ადამიანის ძირითადი უფლებები. განხორციელებული საკანონდებლო ცვლილებების შედეგად, ჩვენს ქვეყანას ეყოლება დამოუკიდებელი, დეპოლიტიზირებული, პროფესიული ნიშნით დაკომპლექტებული და ანგარიშვალდებულების მაღალი ხარისხის მქონე სახელმწიფო უსაფრთხოების სამსახური.

საპარლამენტო კონტროლის მოქნილი მექანიზმის საშუალებით, სამსახურის საქმიანობა დაეფუძნება გამჭვირვალობისა და საზოგადოების წინაშე ანგარიშვალდებულების პრინციპებს და იხელმძღვანელებს სახელმწიფოსა და მისი თითოეული მოქალაქის ინტერესების და არა რომელიმე პოლიტიკური სუბიექტის ნების გათვალისწინებით. ძალზედ მნიშვნელოვანია ის ფაქტი, რომ სახელმწიფო უსაფრთხოების სამსახურის უფროსი არ წარმოადგენს მთავრობის წევრს და პოლიტიკური თანამდებობის პირს. მისი თანამდებობაზე ყოფნის პერიოდში არ ეხება არც საარჩევნო და არც მთავრობის უფლებამოსილების ვადები", - განაცხადა ვახტანგ გომელაურმა.

როგორც ვახტანგ გომელაურმა აღნიშნა, სუს-ის ძირითად მიმართულებას ქვეყნის კონსტიტუციური წყობილების, სახელმწიფო სუვერენიტეტისა და ტერიტორიული მთლიანობის დაცვა წარმოადგენს ამ მოვალეობის უზრუნველსაყოფად სახელმწიფო უსაფრთხოების სამსახურში გაერთიანებულია კონტრდაზვერვისა და ოპერატიულ-ტექნიკური დეპარტამენტები, კონტრტეროტისტული ცენტრი, სახელმწიფო უსაფრთხოებისა და ანტიკორუფციული სააგენტოები.

"მოცემულ კონტექსტში ხაზგასასმელია ის გარემობაც, რომ ერთმანეთისგან გამიჯნულია შიდა და საგარეო დაზვერვა. უსაფრთხოების სამსახურს მხოლოდ შიდა დაზვერვის განხორციელება ეკისრება" - აღნიშნა გომელაურმა.

სახელმწიფო უსაფრთხოების სამსახურის უფროსის კანდიდატურას ფარული კენჭისყრით პარლამენტი ამტკიცებს. მისი კანდიდატურის კენჭისყრა დღევანდელ რიგგარეშე სხდომაზე იგეგმება.