საქართველოში ოკუპანტის ჯარი დგას, რომლისთვისაც ყოველდღიურად პროვოკაციის მოწყობა იოლია

საქართველოში ოკუპანტის ჯარი დგას, რომლისთვისაც ყოველდღიურად პროვოკაციის მოწყობა იოლია - მარგველაშვილი ტუსკის

პოლიტიკა - 17:44, 21 Jul, 2015

996

საქართველოს პრეზიდენტი გიორგი მარგველაშვილი და ევროპის საბჭოს პრეზიდენტი დონალდ ტუსკი ევროკავშირის მისიის ეგიდით ცენტრალური აფრიკის რესპუბლიკაში გაგზავნილ საქართველოს სამშვიდობო კონტიგენტს პრეზიდენტის სასახლეში შეხვდნენ.

გიორგი მარგველაშვილმა აღნიშნა, რომ ქართული ჯარის მუშაობის შედეგად, საქართველო ერთ-ერთ ყველაზე განვითარებულ და ნატო-ს ჯარებთან თანმხვედრ ქვეყნად იქნა მიჩნეული.

„ბატონო პრეზიდენტო, თქვენს წინაშეა ქართული ჯარი, რომელთა წინაპრებიც ათეულობით საუკუნეების განმავლობაში იცავდნენ და აძლიერებდნენ იმ პატარა ქვეყანას, სადაც ახლა იმყოფებით. ჯარი, რომელსაც უპირისპირდებოდნენ ისტორიის განმავლობაში უდიდესი იმპერიები და არმიები, მაგრამ ჯარი, რომელმაც შეძლო და საუკუნეების განმავლობაში გაიტანა და თანამედროვე კაცობრიობის სრულფასოვან წევრად შექმნა ჩვენი სამშობლო - საქართველო. მნიშვნელოვანია ის, რომ ამ ადამიანების და მათი კოლეგების მუშაობის შედეგად, საქართველო ერთ-ერთ ყველაზე განვითარებულ და ნატო-ს ჯარებთან თანმხვედრ ქვეყნად იქნა მიჩნეული.

გვჯერა, რომ უახლოეს მომავალში ის სიკეთე, რომელსაც ჩვენ სხვა სახელმწიფოებთან ერთად ვქმნით გლობალური უსაფრთხოების სახით, დაუბრუნდება ჩვენ სახელმწიფოს. სახელმიწიფოს, რომლის ტერიტორიაზეც სამწუხაროდ და ისტორიული სამართლიანობის საპირისპიროდ, ოკუპანტის ჯარი დგას, რომლისთვისაც იოლია ყოველდღიურად გაუგებარი მიზეზების გამო პროვოკაციის მოწყობა.

ბატონო პრეზიდენტო, ჩვენ ვართ ევროპის ნაწილი. ევროპაში ყოფილა აღმართული კედელი, რომელიც ადამიანებს და სახელმწიფოებს ყოფს, მაგრამ ჩვენი ისტორიიდან და ევროპის ისტორიიდან ვიცით, რომ ნებისმიერი ასეთი ხელოვნური და ძალადობრივად აგებული კედელი, ადრე თუ გვიან ინგრევა. ჩვენ მშვიდად, რაციონალურად და ყურადღებით დავაკვირდებით ამ პროცესს და ვიქნებით საქართველოშიც იმ სიმშვიდის და სტაბილურობის გარანტი, რომლის დადგომაშიც ყოველდღიური წვლილი შეგვაქვს“,- მიმართა პრეზიდენტმა დონალდ ტუსკს.

მარგველაშვილმა დონალდ ტუსკს ხურვალეთში ჩასვლისთვის და ადგილზე სიტუაციის გაცნობისთვის მადლობა გადაუხადა.