საქართველოს პრეზიდენტი გიორგი მარგველაშვილი ევროპული საბჭოს პრეზიდენტს დონალდ ტუსკს პირისპირ და გაფართოებულ ფორმატში შეხვდა.

შეხვედრის მთავარი თემა ევროკავშირისა და საქართველოს ორმხრივი ურთიერთობის დღის წესრიგის პრიორიტეტები იყო. საუბარი შეეხო ევროკავშირთან ასოცირების ხელშეკრულებას.

პრეზიდენტებმა შეთანხმებების იმპლემენტაციის მიმდინარეობა განიხილეს და ამ მიმართულებით საერთო ძალისხმევის გაძლიერებას გაუსვეს ხაზი.

მხარეებმა რიგის სამიტის შედეგებზეც იმსჯელეს. აღინიშნა, რომ ევროკავშირში მიმოსვლის უვიზო რეჟიმი საქართველოს ყველა მოქალაქისთვის უმნიშვნელოვანესია. გიორგი მარგველაშვილმა და დონალდ ტუსკმა საქართველოსა და შავი ზღვის რეგიონის უსაფრთხოების საკითხებზეც იმსჯელეს.

შეხვედრისას ყურადღება საქართველოს ოკუპირებულ ტერიტორიებზე შექმნილ საგანგაშო ვითარებას, კერძოდ წითელუბანსა და ორჭოსანში ე.წ. “საზღვრის” გადმოწევის საკითხის, დაეთმო. როგორც გიორგი მარგველაშვილმა დონალდ ტუსკთან საუბრისას განაცხადა, ეს არ არის ცალკეული ინცინდენტი, ეს ევროპული სუვერენული სახელმწიფოს ტერიტორიის ნაწილის ოკუპაციაა, რაც საერთო ევროპული უსაფრთხოებისათვის უმნიშვნელოვანეს პრობლემას წარმოადგენს.

„პირველ რიგში მსურს დიდი მადლობა გადაგიხადოთ საქართველოში მოპატიჟებისთვის. მართალია, დღეს ჩვენ ვცხოვრობთ რთულ პერიოდში და აქ არ ვიმყოფებით იოლი საქმისთვის. დარწმუნებული ვარ, რომ ჩვენ ერთად უნდა დავდგეთ, განსაკუთრებით ამ სირთულეების წინააღმდეგ, არა მხოლოდ თქვენს რეგიონში, არამედ მთელ ევროპასა და მსოფლიოში.ჩემთვის უმნიშვნელოვანესია დაგიდასტუროთ, რომ მზად ვართ მხარი დავუჭიროთ საქართველოს, არა მხოლოდ ამ კონკრეტულ რთულ ვითარებაში, ვგულისხმობ თქვენს საზღვართან შექმნილ ძალიან უცნაურ სიტუაციას, არამედ, ასევე ჩვენი ხანგრძლივი თანამშრომლობისა და, რა თქმა უნდა, ორმხირივი შეთანხმებების საფუძველზე. დღეს ჩვენ უფრო მეტი ძალისხმევა გვმართებს, რომ მივაღწიოთ კიდევ უფრო მეტ წარმატებას ევროპასა და საქართველოს შორის საერთო პოლიტიკური და ეკონომიკური საზოგადოების ჩამოყალიბებისათვის. ფაქტობრივად, არ მქონდა არჩევანი, ეს ჩემი ვალდებულება იყო გამომეძებნა დრო და ჩამოვსულიყავი თქვენთან, რაც ჩემთვის დიდი პატივია.“- განაცხადა დონალდ ტუსკმა

მხარეებმა კიდევ ერთხელ დაადასტურეს რუსეთის ფედერაციასა და სოხუმისა და ცხინვალის საოკუპაციო რეჟიმებს შორის გაფორმებული „მოკავშირეობისა და ინტეგრაციის შესახებ“ ე.წ. ხელშეკრულებების სრული მიუღებლობა.

ქვეყნის პირველმა პირმა ევროპული საბჭოს პრეზიდენტს მადლობა გადაუხადა საქართველოში სტუმრობისათვის და კიდევ ერთხელ დაუდასტურა, რომ საქართველოს ევროპული და ევროატლანტიკური ინტეგრაციის პროცესი შეუქცევადია და ის ქართველი ხალხის ეროვნულ და ისტორიულ არჩევანს წარმოადგენს.