თინა ხიდაშელის რჩევა რუსული ოკუპაციის წინააღმდეგ გამართული აქციის ორგანიზატორებს

პოლიტიკა - 13:16, 19 Jul, 2015

2632

საქართველოს თავდაცვის მინისტრმა თინათინ ხიდაშელმა ხურვალეთში არსებულ ვითარებასა და მთავრობის კანცელარიასთან გამართულ აქციაზე გააკეთა კომენტარი. ხიდაშელმა განაცხადა, რომ საქართველო რუსეთის პროვოკაციების მსხვერპლი არ უნდა გახდეს.

„ტრაგიზმი, რაც ვითარდება ჩვენს პირობით, ხელოვნურად დადგმულ, ხელოვნურად გავლებულ, ადმინისტრაციულ საზღვრებზე, ბოლო 7 წლის განმავლობაში ყველას თანაბარი წუხილის საგანია. მთავარი ამოცანა მაინც იმაშია, რომ ამ პროვოცირების მსხვერპლი არ გავხადოთ ქვეყანა, პროვოკაციების, რომელსაც რუსული სახელმწიფო მუდმივად ეწევა ჩვენი ქვეყნის წინააღმდეგ.

ბანერს აქ დადგავ, თუ სხვაგან დადგავ, არა მგონია, რომ რუსეთის სახელმწიფოსთვის ამას რაიმე სტრატეგიულ-პოლიტიკური მნიშვნელობა ჰქონდეს. გარდა იმისა, რომ ყოველდღიურად ცდიან ჩვენ მოთმინებას და ცდილობენ გამოგვიწვიონ, კონფლიქტში ჩაგვითრიონ, რასაც გარწმუნებთ, რომ საქართველოს დღევანდელი ხელისუფლება არ დაუშვებს არავითარ შემთხვევაში“, - განაცხადა თინა ხიდაშელმა.

მან ასევე განაცხადა, რომ ადამიანებმა, რომლებიც კანცელარიასთან გამართულ აქციაში იღებდნენ მონაწილეობას, ბევრი რამ უნდა ისწავლონ იმ ადამიანებისაგან, რომლებიც წლობის განმავლობაში ატარებდნენ აქციებს წინა ხელისუფლების დროს.

„ვისურვებდი, რომ ადამიანები, რომლებიც დღეს გამოდიან აქციებზე, ოდნავ მაინც დაემსგავსონ იმ ადამიანებს, რომლებიც წლების განმავლობაში ატარებდნენ აქციებს საქართველოში. შეუძლიათ მათგან ისწავლონ ბევრი რამ. ცუდი არ იქნებოდა. ყველა ადამიანს უფლება აქვს. საქართველო დემოკრატიული ქვეყანაა და მთავარი მონაპოვარი, რომელიც ჩვენ ქვეყანას აქვს, სწორედ ეს არის", - განაცხადა თავდაცვის მინისტრმა.