დღეს ჩვენს ქვეყანაში არის მცოცავი ომი, რომელიც 200 წლის წინ დაიწყო- ჩერგოლეიშვილი

პოლიტიკა - 19:24, 18 Jul, 2015

2197

კანცელარიის წინ მიმდინარე საპროტესტო აქციაზე საზოგადოებას ტელეკომპანია „ტაბულას“ ხელმძღვანელმა თამარ ჩერგოლეიშვილმა მიმართა.

„ჩვენ ვისაც რუსეთის პოლიტიკა არ მოგვწონს ხშირად გვაკრიტიკებენ იმის გამო თითქოს ჩვენ ომი გვინდა და სისხლი გვწყურია. ხელისუფლებამ ეშმაკური გამოსავალი მონახა თავის ჭკუით და ნებისმიერი კრიტიკას ყალბი პათოსით დასმულ რიტორიკული კითხვით ხვდება „ აბა რა ვქნათ? ომი დავიწყოთ?“. თითქოს ერთადერთი ალტერნატივა იყოს ომი.

ჩვენ ვისაც თავისუფალი საქართველო გვსურს და არ მოგვწონს ხელისუფლების პოლიტიკა, გვსურს მშვიდობა. ის რაც დღეს საქართველოში ხდება არ არის მშვიდობა. დღე არ გავა ადამიანი არ გაიტაცონ. მორიგი ოჯახი არ აღმოჩნდეს თანამედროვე ბერლინის კედლის მიღმა, რომელიც შენდება საქართველოში და უკრაინაში. თბილისში ტანკის შემოსვლა არ არის საჭირო, რომ ამ ყველაფერ ომი დავარქვათ. მშვიდობაა იმ ადამიანებისთვის ვისაც არჩევანის გაკეთება უხდებათ სამშობლოსა და საკუთარ საკუთრებას შორის? დღეს ჩვენ ქვეყანაში არის ომი, ჩვენ ქვეყანაში არის მცოცავი ომი, რომელიც 200 წლის წინ დაიწყო. მშვიდობისთვის კი ამ ომის ჭკვიანურად მოგებაა საჭირო, როგორც ბალტიიპირეთის ქვეყნებმა მოიგეს, მაშინ როცა ჩვენ რუსეთთან მეგობრობის იმედით 2 წელწადში სამი ომი გადავიტანეთ. ცხინვალის რეგიონში, აფხაზეთში და თბილისში. როდესაც თავისუფლებას ჰყავს ერთგული მიმდევრები, ბეტონის კედლები ინგრევა, მავთულხლართები იშლება და რუსეთი მარცხდება.“- განაცხადა თამარ ჩერგოლეიშვილმა.

ჩერგოლეიშვილის თქმით, საქართველოს ხელისუფლებამ უნდა შეიგნოს რომ რუსეთთან სასაუბროდ პირისპირ მარტო არ უნდა დაჯდეს რადგან ეს უთანასწორო საუბარია,

„ჩვენ ჩვენმა მეგობრებმა უნდა გაგვიმაგრონ ზურგი. საქართველოს საკითხი უნდა დაბრუნდეს ჩვენი პარტნიორების საგარეო პრიორიტეტების ნუსხაში.“- აღნიშნა „ტაბულას“ ხელმძღვანელმა.

მისი თქმით მშვიდობისთვის ძლიერი ეკონომიკაა საჭირო, ამისთვის კი ხელილსუფლება არაფერს აკეთებს, ამასთანავე საქართველოს მოსახლეობამ არ უნდა დაუშვას ეთნიკურ და რელიგიური პრობლემების არსებობა. ჩერგოლეიშვილის თქმით ხელისუფლება თავისუფლებისთვის ბრძოლის ნაცვლად საქართველოს მოქალაქეების ფულით რუსული ძალის ქომაგებს აფინანსებს.